بي ياتو حق

….
بي ياتو حق ..
بي ياتو دين ..
مين علمك حمل البنادق ..
بين حقول الياسمين

ما شقشقت عصفوره اصلا ..
غير لعشها والفضا ..
ما غردت غير للنسيم ..
امطار وغيم ..
موسم رضا ..
ما طالبت غير بي صراحا ..
ولون صباحا ..
بي ياتو حق تكسر جناحا
وتنسي رب العالمين ..

معقوله وانت وليد صغير ..
لا ليك خال .. لا ليك عم ..
لا مره دقيت الجرس ..
لا مره غنيت للعلم ..
صفقت لي عبداللطيف ..
او زرت ريره الجو خريف ..
معقوله لا قراك معلم ..
حفظك والحصه دين
بي ياتو حق ..
بي ياتو دين ..
مين علمك ضرب البنادق
بين حقول الياسمين ..

معقوله ما كان ليك صحاب ..
ولعبت بي كورة شراب ..
ما سمعت بي مريخ هلال ..
او شفت سانتو وقاقرين ..

معقوله ما حبيت في يوم ..
فرحت يوم ..
وحزنت يوم …
وسرحت بتعد النجوم ..
غنيت مع عثمان حسين ..

هل انت صليت جمعه واحده ..
جمعه واحده ورا الامام ..
ما سمعت كيف دم كل مسلم ..
مالو عرضو عليك حرام ..
او مره حسيت باليقين ..
بي ياتو حق ..
بي ياتو دين ..
مين علمك ضرب البنادق ..
بين حقول الياسمين