في الذكري السادسة لثورة ديسمبر المجيدة
أمْرُقي يا خرطوم شِن راجي
لا تستني مكايد الظالم
أطلع يا مكلوم في وطنك
ألبس توب العزة وسالم
كل الشهداء القدمو روحن
يفدو كرامة الوطن الحالم
أمرقي يا خرطوم من بحري
خطي نهاية الحُكم الغاشم
شرقت شمس البقعة تبهِّر
فوق أكتاف الخلْقِ تزاحم
أمرقي من أم بده وصالحة
ومن ثوراتنا بروق ونسايم
يا محمود يا سيد الشهداء
روحك تفدي مخازي الحاكم
ودنوباوي هتافك داوي
صداهو رجع لي كررى يناغم
بيت المال من أزهري ترفع
استقلال حرية معالم
عبدالخالق رمز القوة
هم يا راشد لهبك ضارم
موردة تلعب تغضب تكسر
حاجز الخوف الطوًَل جاسم
تدي المهدي القبة إشارة
ركَّن فوق القبة حمايم
خلعن باب الليل فتحنو
وكتبن للعرضة تمايم
أكسح يا شعب و أمسح
قدد عين الجور يا مسالم
من شمبات شعبية نحيي
الختمية ضريح أبو هاشم
صبابي ديوم دناقلة تشمر
تردم وجع الحال وترايم
كوبر… كافوري.. وكدرو
تلفظ خبثك روح يا ظالم
من الصافية وللحاج يوسف
شرق النيل بجريفها تقاوم
الدروشاب بأن صيتك مارق
تعلي هتاف الثورة ملاحم
مزاد حلفايا العهد الصادق
تنجز وعد الثورة تلازم
دارنا سلام فيحاء ومايقوما
دكوا حصون الباغي الغاشم
يا خرطوم أطلعي من طورك
يا خرطوم يا وطن ومعالم
أرفعي صوت الحق بالجهري
من الجندول يا شعب مصادم
صلي صلاة الخوف في بري
فجري حممك فوقو غمايم
لو في اللحم أخرجي من بدري
فكي حروف الدجل وطلاسم
كان في العضم أخرجي لي براا
أطرحي أرضاً زيف الواهم
شوق للمنشية ولي ناساً
راكزين بصمود وعزايم
جريف ..معمورة تضمد
جرحك يا وطني بلاسم
الديم بيقيف فوق حدك
لا حدك جبروت لا صدك
مقدام ولي روحك سايم
طايف ورياض و عمارات
خضتوها معارك ومغانم
أركويت صحافة صحائف
من ماضي تليد ومصادم
سجانة الحلة وناس جبرة
يملوك مهانات وهزايم
كلاكلة الشجرة ومن سوبا
نزف الوردة … المحبوبة
نفرح بي عرسك يا وطني
وننصب للعدل محاكم
عبدالمنعم محمد أحمد العوض
ديسمبر 2018م
