التوقبع: لا يزال صوتك الفرح

🟢 حكايات ومواقف:
■ أنا والأنغام والعود في إيدي}
★أهاا اليوم جبنا ليكم خبر من موقع النيلين وهو أن زول{مطرطش} معجب بقونة صاعدة أهداها سيارة باترول قيمتها أكثر من { ٥٠ } مليار جنيه ، يا زول خنقتني العبرة وجاتني عشراقة واتاسفت على سنيني الراحت في التعليم وشقا الغربة الما جايبه حقها. قمت بعثرت أوراقي ودفاتري من مكتبي وأطلقت صوتا حادا كتسليك للحنجرة والحبال الصوتية، وجري لسوق النغم والآلات واشتريت لي {عود وبنقز}، خلاص جاكم الفنان العصامي في خريف العمر،صوت معتق ومافيه أي شخشخة وحجزت لتعليم الرقص في صالة {ترافولتا} واتعلمت الرقص المشخبت داكا العامل زي مشي الكابوريا ، عليكم الله شجعونا والناس المحبطين للعزائم والحماس يمتنعوا، أنا جادي وهسي جاري لأخذ موافقة الفنان المخضرم الكروان { الفنان التربال آل مراد البتولي}وأيضا الفنان الملقب بالشحرور وغريد من الشرق ود كوره المنطلق في عالم النجومية بسرعة الصاروخ }
{{أخوكم الفنان ميد سلمون شريف السكوت}}

■ ورد من الفنان الكروان أبو السيد آل مراد البتولي:
●إلى ميد سلمون الشبل الصاعد، السلام عليكم..
آل مراد البتولي يقرئكم السلام،ويسرني بعد الاستماع لصوتك الهديلي أن قمت بترقيتك من درجة (القونية) إلى درجة ( فنان مبتدئ) وأتمنى لك التوفيق في دنيا الطرب..
●ولاستفادتك من خبرتي في النجومية التي أتربع عليها ، أسرد لك قصة نجاحي:
أنا قبل الاغتراب كنت تربالا يعشق الأرض واكل مما أزرع ولمن الجماعة بقوا يصادروا التلت بقت الزراعة ما بتتخارج فخليتها واغتربت، ولمن رجعت من الغربه بعد سنوات طويله شبه مفلس برضو لقيت الحكومة وقفت حال الترابلة وحالهم أكعب من الأول. أهاا بداية دخلت كار الفن مكره أخاك لا بطل ،لقيت الفن أسهل مجال ممكن بشوية استهبال ودهلسة يأكلك عيش في زمن أهازيج {ياهو دى} قلت يا زول على رأي المثل{تووكا تن دارلوق سللي..أمشى مع الهواء والهوى } قمت ظبط لي دقينة يسموها بالدهلسة { من أجل أبنائي} وبقيت أدس وسط المطاهرات قدام السفارات وأهتف { أمريكا وروسيا قد دنت عذابهما ، فلترق منهم دماء أو ترق منا دماء،أو ترق كل الدماء} وذات مره لحسن حظي عجبت نبرة صوتي زول واصل من الجماعة وبقيت من الأبواق الهامة، وهكذا ولجت دنيا الفن بترديد أهزوجة { دفاعنا الشعبي يا هوو دي} وبعدها غنيت باقة من الأناشيد الحماسية كنشيد { ما دايرين ماكنتوش بلحنا كتير ومالي الحوش}ومن ثم باقات من الأغاني العاطفية الجياشة مثل{ورا ورا وراجل المرا حلو حلا وشانقلي طاقيتو وجلابية بيضا مكوية} وهكذا ولجت دنيا الفن من أوسع أبوابه وبقيت نجم من نجوم الفن ،وهسه ما شاء الله{خمسة وخميسة على الحساد والعيونم الحارة} صار لي سنين وسنين باكل {ملبن} من الفن، أهااا في بداية مشواري الفني كنت بمش في مناسبات لمات الجماعة الكتيرة وغالبا ما كان يحضرها الرأس الكبير وعادة كانت تنتهي خطبو برقص هستيري على أهازيج (ياهو دي)..يا زوول ذات مره قدمت رقصة حماسية لنشيد {يا هوو دى} في حشد حضره الرأس الكبير وعجبو رقصتي وما قصر معاي في المعلوم ..المهم ذاع صيتي كفنان محترف وكنت أغني في البدابة {بالدربكة} في أحياء الكلاكلات ، ولن أنسى لا أنسى ولا يبارح بالي حفل العمر اللي أحييته في فناء حوش بجوار {البيت الأبيض البرطمي} في كوبر محل الرئيس ينوم .
●يا أخووي الشريف ، اتحسر واتندم إنو ما ولجت كار الفن من بدري، أتاريك دنيا عالم مخملي ، راحات وونسات ، تصدق أصدقائي منو ، أبدأ ليك من الفنانات والقونات ladies first {ندوية القلعة، تغريد العشرة ، ريان الساتا، مروة الدولية، ننة العنكبوتة، إنصاف مدني وعاشة الجبل.وأخريات} ومن المتفننين أسماء رنانة {فرفور ومحمد بت وطاسو وتباشي ونيجيري..وآخرين} يا زول ندمان على خسارة عمر ضيعت معاكم هدر في الغربه، لحظي الكعب ما لقيت زول منكم شجعني وقال انو صوتي سمح ،وانو أنا مشروع فنان عملاق..أهاا الأغنية التي كانت سبب شهرتي وثبتت قدمي في دنيا الفن والطرب وخلاني فنان الشباك الأول هي أغنية {الريدة} من كلمات الشاعر أبو عرام البعشوم الملقب( بخرتيت) ومطلعها يقول {حبيتك.. لكين الريدة طلعت في أختك} والشيالين واللي أنا اخترتهم بعناية من جنب قعدة{نوال العسول} ست الشاي يرددوا من وراي بأصوات غير متناغمة { يا اخي بالغت،يا اخي باالغت} والنصيحة يا ود سلمون من غناي مخضرم عرك الفن من زمن ( ياهو دى)انو في أغاني اليومين دول الكلام الكتير مش مهم ،المهم الأورغ يكون صاخب والساون سيستم يلعلع بأخر صوت ودور الفنان في اتقان الصرخات الحادة وأكتر أغنية أثيرة عندي من إبداعاتي أغنية{يا اخي بالغت} فمناسبتها مؤثرة وهي قصة { شوكشة} بلغة شباب الزمن ده حصلت لشابه} وادندن بيها صباح مساء ، وبالمناسبه أنا شهير في الوسط الفني ب{الحنش الأسمراني والبعض يدلعني بعصفور من الشرق} لكين دايما يا حظي أنا تعبان،واحد قال معجب مووت بإبداعاتي الغنائيه الرومانطقيه وامس اهداني{كارو قديم مطرشق كفراتو} ووعدني { حمار بسرجو) قريب ، ومجاملة غنيت ليهو كوبليه من اغنية {ما دايرين كريسيدا ، عندنا كارو بسيدا} ..
النصيحه يا ميد سلمون ، لا تتردد وتعال اتعلم الرقص في مركز{ آل مراد البتولي للغناء والرقيص للقدامي وللراغبين من الجدد} وشارك مع فرقتي الغنائية في احياء مناسبات(الأعراس والسمايات وافتتاح الروضات وأحيانا في حلبات الزار) في الكلاكلات ومايو ومانديلا والشقيلاب ويمكن تطلع ليك {ببسكليت}من أحد المعجبين هو أنت فاكر نفسك{عاشة الجبل} عشان تحلم تطلع ليك { بباترول } فشر وبعدين الطمع ما كويس، ما قالوا الطمع بيجيب العمى .
● آخر خبر فني:
▪︎أخونا الفنان ود كورة زي ما بتعرف يا ميد سلمون كان موظف كبير قدر الداهيه وعندو عمارة وسيارة ، قال ايه!! الوظيفهطة ما بتاكل عيش في زمن الهشتك بشتك ، ما هو شايف المتفنين والقونات نازل عليهم القروش زي الرز ، المهم قدم استقالتو ، وزي ما بيقولوا{بعد الشيب دخل الكتاب} دخل دنيا الفن معانا بس بصراحة اجتهد وشقى ليل نهار وهسى بقى فنان الشباك الأول في إحياء مناسبات السمايات في الشجرة والعزوزاب واللاماب بس مشكلتو انو تعبان مع { الحناكيش والحنكوشات } أهاا لمن يندمجوا مع أغنياته العاطفية تتعالي صفافيرهم وصيحاتهم {يا حاجي كولن كولى..وااو ياحاج} والفنان ود كورة عصبي زي ما تعرف يطلع من طوره ، ونهاية كل حفل بعيد عنك مسوي مضاربة، ومرات ياخد ليه هبدة طوبة في أم راسو وأنا أقول ليه بالنوبين {وجع استهلنمي }..
{{ سيد حسن مراد }}

🟢 رجفة قلم 🟢
▪︎▪︎ويح قلبي الما انفك خافق فارق أم درمان باكي شافق يا أم قبائل ما فيك منافق سقى أرضك صوب الغمام. يا بلادي كم فيه حاذق غير إلهك ما أم رازق من شعاره دخول المآزق يتفانى وشرفك تمام..
{{ خليل فرح }}
■ الفنان ود كورة الملقب بغريد الشرق