حباً و كرامة

أحذروا الدجالين تجار الدين..حرفة الكيزان و من شايعهم..
في يوم في مكتبي أبان فترة عملي الجميلة في مشرحة الخرطوم… دخل علي 4 شيوخ بلحي مرتبة و محفحفة و مصبوغة كسواد الليل..و كلهم لابسين زي يونيفورم كده ( جلاليب ناصعة البياض و عمم مكربة و شالات خضراء ) و كمان عندهم رائحة عطر عجيب كده ملت المكتب..و انا عرفت طوالي انهم من اهلنا في الطرق الصوفية ( و التي فيها الصالح و الطالح حال كل شي في الارض )..
طوالي قمت عليهم بكل الترحاب اللازم و كوركت لحاجة خديجة الرائعة ان اكرمينا جميعاً بشاييك الكارب..
و الشيوخ طوالي دخلوا في الموضوع .. قالوا لي شيخ ( فلان ) رحمه الله قد توفى في ام درمان و تم دفنه في مقابر حمد النيل قبل اكتر من 9 شهور ..و الان بما أن البنية ( القبة ) بتاعتو جهزت تب .. هم جاءوا لترتيب نقل جثمان الشيخ ليدفن في قبته..( و لاحظ جثمان دي كلمتهم هم )..المهم سألتهم من الاوراق و التصديقات اللازمة من كل الجهات الحكومية المسئولة ..لقيتهم مجهزين كل شي.. قلت ليهم انا حاضر في أي وقت..بس طلبت منهم يجهزوا صندوق للنقل و يجيبوا معاهم قماش ابيض عشان نرتب فيهو الرفات لانو الجثمان بكون اتحلل و الكفن اهترأ او تغير لونه حسب نوع القماش.. و انا بقول في كلامي ده ..هب واحد منهم ( شبعااان كده و ليهو فقر ) … قال يا دكتور ما تتكلم كلام فارغ ، قلنا ليك ده شيخ فلان ..و جثمانو ما بتحلل …
رغم زعلتي الشديدة من الاسلوب الجارح ده لكن قلت استهدى بالله و ألزم جانب الوقار و الحلم ..قلت ليهو يا شيخنا..التحلل ما بعيب الانسان..و ده حكمة الله في خلقه لكي ترجع عناصر البشر للتراب الذي خلقت منه..و عند البعث يسقط الله عز و جل مطرا كمني الرجال هو الارواح و تعود العناصر لبعضها و يحدث البعث و النشور ..
و ان كل الناس ستتحلل ما عدا اجساد الانبياء عليهم السلام و كما هو ثابت في قصة سيدنا سليمان عليه السلام.. و قلت ليهم نعم هناك تغير من متغيرات ما بعد الموت اسمه الموميائية..و ده بحدث في الجثث المدفونة في نوعية تربة خاصة تمتص الماء و ظروف مناخية معينة ذات حرارة عالية تعيق عمل الباكتيريا .. و عندها يتحول جثمان الميت لما يشابه المومياء..و يكون الجلد جاف و سميك و مخرم بحشرة العتة.. و من جوه كل الاحشاء بتكون اختفت و تاكلت بواسطة العتة و تحولت لبدرة و المومياء جوفها خاوي و فارغ تماما الا من العظام..( كأنهم أعجاز نخل خاوية ) و ان هذا التغير ممكن يحدث لكل الناس من مختلف الديانات و حتى الما عندهم دين..و ما فيهو كرامة او اعجاز لأحد… المهم اديتهم محاضرة لمن اتكيفت من نفسي .. لكن وحاتكم ..كلهم رمقوني شذراً..
و الزول الشبعان داك قال لي : يا دكتور اتأدب و بطل الكلام الفارغ ده..شيخ فلان ما بتحلل خالص ،
قمت على حيلي قلت اطردهم بعد كترة الاساءات دي…الا أن أكبرهم سنا و مكانة قال لي.. يا دكتور نحن متأكدين الشيخ ما بتحلل ..و انت ربنا يهديك و براك حتشوف و تقتنع..
قلت الزول ده كلامو منطقي و فعلا البيان بالعمل..قلت ليهم طيب جيبوا طاقة قماش ابيض و ان شاء الله ما نحتاج ليها و حتكون صدقة منكم للموتى مجهولي الهوية.. طوالي وافقوا و قالوا لي ما عليك نجيب ليكم طاقات مش طاقة واحدة..
و حددنا يوم لنبش قبر الشيخ ..و من الصباح الباكر مشينا انا و التيم بتاعي و معانا عدة الحفر ..و من دخلنا المقابر لقيناها مليانة بعدد هائل من البشر ..و ايقاع نوبة تقيل و اهازيج صوفية و بالقرب من القبر كمية من المباخر يفوح منها البخور العطري الذي ضمخ الاجواء بعبق رهيب و مع ايقاع النوبة و الاهازيج و كمية البشر..و تلك الاجواء الروحانية اخوكم دخلتو خووفة جد.. معقول كمية البشر ديل كووولهم يكونوا على باطل ..و انا الصعلوك ده جاي مصدق كلام العلم بتاع الخواجات ديلك..و الشغلانة دي باين عليها جد جد..و انا اتفلسفت على الشيوخ و قليت ادبي ..كر عليك يا علي ود ليلى ، عاينت للشباب المعاي لقيتهم هم ذاتم الرجفة ماسكاهم… المهم قويت قلبي و قلت للشيوخ لازم تبعدوا المريدين الكتار ديل بعيد شوية عشان نعرف نشتغل و قد حصل.. و فضل معانا الشيوخ الاربعة .. و حفرنا القبر و شلنا تراب المطمورة بره… و وصلنا ود اللحد..و طوالي رائحة التحلل الحلوة طلعت و انا قلبي برد و خوفتي راحت تب… و لما فتحنا ود اللحد لقينا الجثمان تحلل كما يجب و صار عبارة عن عظام بها تلطخات زنخة و الكفن اهترأ.. اها عاينت للشيوخ الفوق بقوة شديدة و معاهم الزول الشبعان داك..و طوالي حنا راسو و أداني القماش و قال لي بالله يا دكتور ضاير العظام كويس..
قلت ليهو طبعا.. ستر الميت واجبنا بالتأكيد ( و دي من اهم الاشياء يا احباب هي ستر الميت و عدم استعراض جسده او اجزاء منه الا للاغراض العلمية و الطبية )..المهم سترنا الرفات و ختيناها داخل الصندوق..و سلمناهو للشيوخ الاربعة..
و فجأة صاح الزول الشبعان : الله اكبر..الله اكبر ..جثمان الشيخ طلع زي ماهو..
و هنا هجم الحيران و المريدين على القبر..رجال ونساء..وكل منهم يشيل خمشة من تراب القبر و يعبي في طرفو بقصد التبرك و كده..
عاينت للشيخ الدجال..و عاين لي بقوة عين عجيبة..و كأنه يقول لي..كان راجل افتح خشمك ده قول غير كده ..عشان ديل كلهم يدفنوك هنا في قبر الشيخ ده ذااتو يا معفن..
بالله ما يقوم واحد بايخ منكم يسألني .. أها وبعدين عملت شنو
عشان كده احباب أحذروا الدجالين بأسم الدين..و أخطرهم الكيزان ومن شايعهم..والدجل والكذب والتجارة بالدين الشفناها في السودان في ال30 سنة الاخيرة أصلها ما حصل مثلها من قبل ..ما تنسوا رعاكم الله.
( المفسدين ناس في حماك ربنا..و هي لله )…لسه قاعدين بالكوم و الردوم والدولة العميقة حقيقية ولا زالت بلدنا ترزح تحت نيرهم..
وحتماً حتبدي الايام دي القصة البايخة بتاعت هبوا لنصرة الدين..وأن الاسلام في السودان في خطر في السودان..لانهم هم بعتقدوا انهم من ادخل الاسلام الحق في السودان..
والمؤسف حقا ان هناك كثيرون يصدقون اولئك الدجالين تجار الدين.. قاوموا سرطان الكيزان بكل قوة..

ماسقطت لسه