هدنة …! كروان مدني …وأمير الشجن عبد العزيز المبارك
حتى القمر غار من صفاك …🥰
مدني من جديد تلعب بالكعب هذه المرة وتدفع ب
( عبد العزيز المبارك ) ( ليبرو ) متحرك في كل المساحات بي صوتو الرويان …وشجنو الممتد وطلتو اللافتة …..!!
وتحرمني منك ..!!
أي زول بشعر إنو ( عزيز ) دا من حلتو والجيران بهذه الملامح الوديعة وهذا الحضور الوريف
( عبد العزيز المبارك ) طعموا برا …..!!
في ملامحه فرح وشجن….🥰 وفي صوته شدو ولحن وفي إحساسه دفء ووطن ….!!
ولذلك تميز وفي قلوبنا سكن ..
صوتو بشبهو ….مليان حب كدا وعذوبة وفيهو ريحة الناس وجمال إحساس……!! وسماحة الطلة
ظهر وسط العمالقة واستطاع ان يحجز مقعده في
القلوب بأغنيات غارقة في الشجن وممعنة في الجمال وحلوة الصدفة البيك جمعتنا وخلت عينا تلاقى صباحا 😍
(وعينا طولت ما لاقت صباح ياعزيز ياخ )
والصباح إن لاح )
أغنيات ( عبد العزيز ) كلها بتحسا بيها طالعة من الجوف ومسافره بلا جناح …!!
وبتاخدك معاها …
هو ذاتو مهذب كدا عبد العزيز المبارك دا
لاتملك إلا أن تحبه ..ليييه ماعارف …!!؟
وماكنت عارف ياريت .….ياريتني كنت عارف 🥰
إلتقى مع شعراء كثر لكن لقاءه مع ( عثمان خالد ) كان مضيئاً
فقد إلتقى ساحر ( بارا ) بكروان ( مدني ) داخل الصندوق ولعب عثمان خالد في ( بيت اللعب )
( فقاعدة ( الجزيرة ) تعتبر إحدى قلاع الإبداع الحصينة في السودان )…!!
لكن الموهبة الساطعة والحضور الأخاذ …. مكناه من الدخول ….وخلتو ( يتجدع ) في شوارع مدني …!!
فضربت ( بارا ) ( السني ) بوابل من ( الإحساس )
في ( إنقلاب ) عاطفي قادة المتقد ( عثمان خالد )
و( بتقولي لا ) …!
( صفق الذواقة وانتبه السودان )…
🎼
ووحياة شبابك ذبت في عينيك حنان ومغازله
سافرت فى رحلة مشاعر ملهمه ومتأملا
وبتقولي لا 😥
🎼
شوف المسيرات دي كيف …!!
جاية من ( بارا ) وضربت ( مدني ) وضربتنا نحنا كلنا
فقلنا هل من مزيد …
🎼
وشفتا الورود من وجنتيك غيرانه جات متوسله
حتى القمر غار من صفاك واصبح يردد فى الصلاه
وبتقولي لا …!!
( لا لا لا لا لا ….كدا كتير ) 🥰🙌
( عبد العزيز المبارك ) ( مبهج ) يسكب من روحة في الأغنية فتتحرك
و( باص ) عثمان (باص قون ) …!!
( لقد حلق الرجل ) 😍 وارتقى عزيز
والله فوق مدني 🙌
( بتقولي لا ) لحنا ( الفاتح كسلاوي ) وألبسها هذا اللحن الزاهي البديع ..خلاها ترقص براها 💃
و ( كسلاوى ) ملحن مبدع ومهم وعبقري ظلمته الدنيا ولم تنصفه الأيام …😢
لحن ( ولو جارت عليك أيام..تعال لعيونا بتشيلك ) 😍
للمختلف ( إبراهيم حسين )
وعينيا ما تبكي لي ( ترباس ) …
( غناها ( الحوت ) …..( فبكت مرتين )😭
🎼
ولا هو البحن ليّا ..ولا الزمن بيرحم 😢
🎼
( كسلاوي ) دا لحن ( ليه كل العذاب ) لزيدان ..
والعذب ( التجاني حاج موسى ) وغيرها من النواضر
ياخ دا لحن …
ومن لمسات حنانك خلاص تمينا دور
وكل ماغني شادي ذوبني الشعور
يلحن شنو تاني ….!!
كتبا ( الجنرال ) عوض أحمد خليفة حيث جمع كل قواته ورابط على حدود ( العندليب ) المحصنة بالجمال ودخلها ( غنوة )
والتقى زيدان في الهواء الطلق عبر روائع
هبشت الشعب السوداني كلو …وكانت هذه احداها
🎼
ولا تسأل مشاعرك ليه عيني بكن …!!
( بلد أدوها عين قوية والله )
لم يكتف ( خالد ) بهذا اللقاء فتجددت اللقيا مع عبد العزيز في واحده من أكثر الأغنيات السودانية رشاقة وخفة وجمال
كل ما تسمعا بتجيك ( هنايه ) ديك في خاطرك بغض النظر عن من تكون وأين هي الآن…
ويا احلي عيون بنريدا
في زول علمنا الريدة 😍
عبد العزيز بسوق الأغنية دي حتى الخميل
ويمنحها من إحساسه فتميل
وعينيك الضحاكة خجولة
برمشك سيرة نقولنا
يا روعة و فيك طفولة
و فيك حلاة غرويدة
يا احلي عيون بنريدا
( شوف الغرويدة إنتا ) 🥰
منحها عمر الشاعر هذا اللحن الراقص فاهتزت وبكت …
وعمر الشاعر لم يكن ملحناً بقدر ما كان ملهماً سكب من روحه ( العطشى ) في الحانة ( الروية ) فمشت على ( مقلتين )
وفيها حلاة غرويدة …
وقد شدا كروان ( الجزيرة ) ( عبد العزيز المبارك ) بكلمات ود ( أم درمان ) الدكتور على شبيكة …
وليه ياقلبي ليه تاني رجعت ليه …
وين أيام زمان عدت تحن ليه
لييييه…🎼 ليه يااااا قلبي ليه 💔
( وعندنا تغازل ( أم درمان ) ( مدني ) فاعلم أن الأمر
جلل ) …..!!
وحياة الشجن .. وأغلي الذكريات
ما تردد كلام .. يحي الفات و مات
وما تخلي العيون .. تحكي الأمسيات
وتجدد غرام .. يمكن هان عليه
وليه ياقلبي ليه ….!!
( غايتو جنس ألم )
وكان ( علي شبيكة ) ومع موهبته المتأججة رقيقاً أنيق
تخرج المفردة منه جزلة مشحونة بالجمال معبأة بالفرح مترعة بالشجون مليئة بالروح
هو زول بقول ..
يوم رحيلك يا حبيبي شفت كل الكون مسافر …..
لاهزار في روض غنا
ولا زهر عطر بيادر ….!! 🌹
دا إلا يكون هو ذاتو هزار ….!! 🕊️
وقد كان ….🥰
التقىى ( عبد العزيز ) بالحنين ( الطيب عبد الله ) الذي أهداه أغنيه ( طريق الشوق ) وهي من كلماته وألحانه من جميلات ( عزيز ) ويظهر فيها بهاء ( الطيب ) وهو بهذه الأريحية
جدعا باص بيني لي ( شفت ) مدني ولم يتردد الأخير في بوضعهافي سقف الأشواق …
وتطول يا ليل وفيك الطول مآسينا
ويسكن فيك دموع الشوق ومال القلب واسينا
حبيبنا هناك بعيد وسعيد وناسيني
متين ياشوق ظروفنا تروق على الافراح ترسينا
( والله كلنا يا شوق منتظرين ظروفنا تروق وعلى الافراح ترسينا )
إلا القسمة..😢
شوف الفنانين وكت يتمشو في شارع النيل وطريق الشوق …!! يتبادلو الزهور والزينة …!!
وحبيبنا هناك بعيد وسعيد وناسينا
( الله حي )
اشتهر عبد العزيز برحلاته الخارجيه معرفاً بالفن السوداني في كل المحافل في جولات عربيه وأوروبية
حكي عن الأغنية السودانيه في ( بون ) الألمانية فاستمع المهتمون …..!!
وغني بالاثيوبي … ( أديس ) كلها رقصت …!!
تصدر شباك النجوميه لفترات طويلة بإطلالة أنيقة وصوت مختلف وأداء راقص وكانت كل أغنياته ( عجوة معطونة في عسل )
وسكه ما بتودي ليك تبقى ظلمه حرام مشيها
وساحه غيرك ما بتزهر لا برش الغيم عليها
ياجميل الابتسامه طول عمرنا بنشتهيها
وياعسل زايد مصفى …
ويا ااااااا ياعسل
ودي كتبا ( النحلة ) اسحق الحلنقي وكان لازم يتلاقو
هو وعبد العزيز فالنوارس على أشكالها تقع …
فكانت اغنية تشبه طعمها وطعمه وكم امتزجت في ذاكره السودانيين بافراحهم وأعراسهم
( والحفله بي عبد العزيز المبارك )💃
ترنم عبد العزيز المبارك ب ( مناجاة ) روحية سما فيها الرجل وتجلى واقترب من الروح وانشدها من جوه
وأدعـوك ياربـي لتغفـرحوبتـي * * * وتعينـني وتمـدّنـي بهـداكـا
فاقبلْ دعائـي واستجبْ لرجاوتـي * * * ما خاب يوماً من دعـا ورَجاكـا
فكان نقياً وجميلاً مخبراً ومظهر لايتحدث كثيراً
ويغني أكثر رقيق وأنيق ومهذب عبر فينا كنسمه
ومضى بيننا كشهاب لم يترك سوى الحب والرحيق …!!
ويانجوم الليل أشهدي أنك في الوجدان السوداني نغم وشعور ..
أغنيات وذكريات …..معاني وشجون ….!!
وبتقولي لا …!!
💞
