شارع النضال ما بخون
درب الحقوق مرصوف
ثورة شباب مغبون
والليل مصيرو يروح
ويطلع صباح مسجون
الكف تلم الكف
والخاطر المحزون
علم البلد اتهان
والشعب قط ما بهون
سودانا نحن فداك
مسرح وتاج وفنون
نحميك من سلطان
جاير وحولو عيون
مالية البلد ظلمات
وحريق وهم وجنون
عبدة ضلال المال
الفاحش الملعون
ماشين وليك طالعين
نسوان رجال وبنون
نهزم ضلام الخوف
نمسح أنين وشجون
اصبح وطنا غريب
في كل حي مسكون
وجعو اترسم في الخد
والدمعة مالية جفون
نطلع نعيد للناس
بلد اتنهب مرهون
لعصابة الانقاذ
بين الفساد مدفون
لازم يعود النور
ويطلع زمن مأفون
ويرجع بريق الضوء
لبن الرضيع وديون
كسرت رقاب الناس
حرقت تلال وغصون
وبيوت رواها الجوع
عطش الكرامة ظنون
خير البلد في اليد
ما في شعار ودقون
ح نرجع الإيمان
نبني البلد ونصون
ونمجد الانسان
كاين يكون ما يكون
بي عزة السودان
رافعين غصون زيتون
حق الحلال ما بضيع
شارع النضال ما بخون
