تسقط بس: شاهد عيان مشارك في مظاهرات اليوم: لا أعظم ولا أجمل من اليوم

الخرطوم- التحرير:

مصابة خلال التظاهرة

كتب أحد الذين شاركوا في مظاهرات اليوم  (31 ديسمبر 2018م)مشاعره ومشاهداته، فقال في إشارات سريعة: “والله ما في أعظم ولا أجمل من يوم الليلة.. اقسم بالله العظيم والله على ما اقول شهيد..كنت في قلب الحدث من ساعة البادية..

في تمام الساعة الواحدة الا دقيقتين بالضبط على دقة الساعة السوسرية انطلقت شرارة الثورة من دون انذار: “حرية سلام وعدالة والثورة خيار الشعب”.. والله العظيم شعب معلم بكل ما تحمل الكلمة من معنى.. تلتها الهتافات وفي ظرف أقل من نص دقيقة تجمع مئات المتظاهرين من كل صوب وحدب..تجمهر الناس بالمئات لا بالألوف في اماكن متفرقة في العربي حالت المتاريس التي استخدمتها رجال الامن من ان تلتحم، وقد رموهم بالغاز والرصاص من كل حدب وجانب (من اعلى ومن الاسفل).. وكان هناك قادمون من جهة السجانة حالت المتاريس ايضاً دون التحامهم مع اخوتهم الثوار، ولكن ابت انفسهم الا ان يشعلوها، حيث كانوا، واتجهو جنوباً نحو سوق السجانة..لا تخريب ولا قصف ولا تكسير.. فقط “حرية سلام وعدالة والثورة خيار الشعب”.. والله ما قادر اوصف ليكم اللحظات العظيمة دي.. انتو شاهدتو بعض المقاطع، لكن الحقيقة اسوأ.. كانت أحيانا المسافة بين رجال الامن والمتظاهرين اقل من مئة متر.. غايتو شربنا لمن قلنا بس وصلنا مرحلة بقينا ما بنحس بيهو.. والله ما في زول خايف من الرصاص بس الشي الوحيد البعذب بالجد الغاز..

وكتب أحدهم معلقاً ” وقسما بالله وقسما بالله..
انا بكتب في البوست ده والعبره خانقاني بالانتصار العملوا الشعب السوداني ده.
ياخ دولة تطلع كل عتاده المسلح وجميع انواع السلاح العندها.. والموجود الان في صينية القندول ده وقسما بالله نحرر فلسطين والدول المجاورة.. والرعب الظاهر في عيونهم ده كلوا امام شعب لايحمل سوى الحجاره(دوشكات ومضات طيارات وأسلحة ثقيله وأسلحة بيضاء)
الف مبروووك الشعب السوداني المرعب الف مبروك.
وحتتنتصروا وقسما بالله
#تسقط_بس”.