درجنا نحن معشر الاطباء على تحمل كافه اصناف المرضى والمرافقين ممن يأتون الينا بمختلف امزجتهم وامراضهم وعللهم النفسيه والعضوية .. !
نتعرض يوميا الى كافه انواع التقلبات المزاجيه والاهانات والاساءات من مختلف الاشكال والالوان .. ولكننا تعلمنا في مدرسه الطبيب السوداني ( شيال التقيله) ان نقابل الاساءة بالاحسان .. وان نتفهم ظروف المريض وملابسات حالته .. وان نراعي العوامل (النفسيه) التي آلت به الى تلك التصرفات !

لذا تجدنا في هذا المعروض .. نرد عليك ب اخلاق الاطباء النبيله لا ب (اخلاقك) !

وتاريخ الطبيب السوداني في معيه الصحه ووزارتها تاريخ طويل يحتاج الى مجلدات ومجلدات ل سرده .. نحن معشر الاطباء (المواهيم) اللذين رضينا بالعمل في ظروف اشبه ما تكون ضربا من ضروب الخيال !

صدقت ! ف نحن (مواهيم) لاننا بنشتغل 24 ساعه دون ان يحتسب لنا ذلك ك (اضافي) او (اوفر تايم) !
نحن مواهيم .. لاننا نعمل دون اي معينات تذكر .. نشتري القفازات والسماعات وموازين الضغط والحقن الفارغه والكحول المعقم من رواتبنا التي لا تكفي اجره المواصلات !
نحن مواهيم .. لاننا بندق الشير لي العيان في نص النبطشيه .. عشان ما بيقدر بعمل صورة اشعه .. ونجري نشحت ليهو سرير .. ونحنس المدير الطبي عشان يخفض ليهو في العمليه .. ونشحت ليهو قزازتين دم من بنك الدم .. ونشحت ليهو مضادات حيويه من مناديب الدواء والصيدليات .. ونشحت ليهو دربات .. ونشحت ليهو فراشه .. تخيل انو مصطلح ( شحته) دا اكتر مصطلح بيستخدموا الطبيب السوداني طول ماهو لافي في المستشفيات !
عادي تلاقي زميلك في اي عنبر .. اوووووو فلان .. مالك بي جاي ؟
جاي تشحت لي عيانك شنو ؟!!

نحن مواهيم لانو قبلنا ناخد في النبطشيه ٥ جنيه .. اي ٥ جنيه الواحدة دي واحيانا الوزارة زاتو ما بتدفعها !

نحن مواهيم عشان بنقعد نحرس عيان يومين وتلاته في المستشفى وما بنمشي بيوتنا بسبب نقص الكادر التمريضي ونقص الكادر الطبي لانو الوزارة ما عندها جوب !

نحن مواهيم لاننا بنكون شغالين ولافين في المستشفيات والوازرة بترفض تديني اي مسمى وظيفي وبتتعامل معانا ب (الحافز) .. يعني بنشتغل مجانا عديل !

نحن مواهيم لانو بنقبل انو عيان يموت لانو ما عندو حق العلاج .. او ما عندو حق الاشعه المقطعيه .. او مافي حضانه لي بيبي مولود جديد .. او مافي جهاز تنفس صناعي في عنايه مكثفه .. او مافي دم لي ام بتولد وحا تموت من النزيف !

استاذ الهندي !
هل تعلم انو الناس بتموت في السودان بتسمم الدم الناتج عن جروح السكري ؟! عشان العدة بتاعت الغيار ما نضيفه لانو معينات التعقيم اللي مفروض توفرها الدوله شبه معدومه !!

هل تعلم انو الناس ماتت في كسلا وشرق السودان من داء الكنكشه اللي علاجو فقط درب بندول بالوريد ! والوالي نكر والرئيس نكر واداها ضحكه كمان على الملأ !!

هل تعلم كم طبيبا وطبيبه ذرف الدمعات الغوالي يوم شفنا بي عيونا اغلاق حوادث مستشفى الخرطوم التي تم تجفيفها عمدا بواسطه بروفيسيرك مامون حميدة !!

هل تعلم انو الناس بتموت في شمال السودان من السرطانات والدوله ما قادرة تعمل ليهم مستشفى ولا حتى تطلع قروش للبحث العلمي عشان يعرفوا الاسباب والحلول !

هل تعلم انو في اطفال في قلب الخرطوم بيموتوا من الجفاف وسوء التغذيه وامراض الطفوله السبعه وانو في اطفال ما سمعوا بالتطعيم زاتو في حياتهم !

هل تعلم انو الحاجات البتكتل الناس دي كلها فضايح في اي بلد محترم! وانها كلها تندرج تحت بند المعينات اللي مفروض توفرها الدوله !
لانو بالطبع الدكتور ما حايجيب معاهو حضانه من بيتهم .. ولا حايشيل ليهو قزازة دم في جيبو ولا ممكن يكون عندو فرن تعقيم في فردة شرابو ؟!

اضراب الاطباء الحالي واضح المعالم والتعريف ..
واتحداك ١٩ مرة تجيب اسم مريض واحد في حاله طارئه رفض طبيب علاجه ! يا اخوي نحن مرضانا الفي العنابر زاتهم بنشوفهم بالدس عشان قلوبنا دي زاتها ما بتتقبل ولا بتتحمل .. ناهيك عن طفل يعاني من حريق ويرفض اي طبيب سوداني علاجه ! دا المستحيل الاعظم بعينه ولا تقدر تزايد علينا !

والبنعملوا في المستشفيات في السودان ولا لو وظفتوا (جون سنو) ذات نفسو ومعاهو التنانين التلاته ما يعملوا يا عزيزي !!
ودا كلو محبه في مهنتنا .. ومحبه في الشرف الباذخ ب انتمائنا لهذا الوطن !

من الغريب والمحير جدا انك تكتشف الليله في 2019 فجأة كدا انو في مرضى بيموتوا في السودان !
والمحير اكتر انك عمرك ما دخلتا مستشفى حكومي عشان تشوف بعينك شكل المكان والمعينات الفيهو ..!!
طبعا ما بنلومك ..
و دا ما مقامك ..
ف انتم مرضى الزيت و (الزيتون) !

اه !! .. الاطباء الباكستان والهنود الحا تجيبوهم يشتغلوا ..
حايرضوا يشتغلوا بدون سماعات ولا جونتات ولا شاش ولا دربات ولا دم ؟
حايرضوا يجروا ٤٨ ساعه نبطشيه دون مقابل ؟
حايرضوا يشتغلوا شغلهم وشغل الممرضين .. يركبوا فراشات .. ويعملوا غيار .. ويقلبوا المريض في السرير .. ويسوقوهو من العنبر للعمليات ؟
حايرضوا يقعدوا في كراسي الحوادث المفتوحه على مصراعيها وكل مريض بيسمع شكوى الباقين دون اي مراعاة للخصوصيه ؟
حايرضوا ينوموا في استراحات المستشفيات المليانه صراصير ونمل وفيران ومويتها قاطعه كل السنه ؟!

والاهم من كدا .. الدوله حاتجيب ليهم دولارات من وين !!