نبض الاعتصام: الثوار يستقبلون “رمضان بلا كيزان”
“ونصوم رمضان من غير كيزان” شعار ردده الثوار قبل السقوط الأول للنظام، وقد استجاب الله دعوات المظلومين الصابرين عبادالله الصالحين المتوكلين علي ربهم، والمتسلحين بالإيمان والعزيمة والإصرار علي إكمال المشوار.
سويعات تفصلنا عن الشهر العظيم والثوار الأحرار بالميدان تحت هجير الشمس يفترشون الأرض، ويلتحفون السماء وقلوبهم مشرئبة لاستقبال الشهر الكريم والبلاد تنعم بالأمن والسلام والأستقرار، مودعة سنين القحط والجفاف برحيل النظام المستبد الجائر.
التقينا عدداً من الثوار وطرحنا عليهم: كيف تستقبلون شهر رمضان تحت هجير الشمس الحارقة وارتفاع درجات الحرارة بهذه الأيام؟
✌الشيخ عمر.. رجل فوق السبعين من عمره أجابنا قائلا:ً يا ولدي الحصة وطن، ونحن عشان نحمد ونشكر ربنا بجد وحقيقه لازم نصوم رمضان بالميدان، وسيكون الأجر مضاعفاً بإذن الله.
✌الشاب الثائر منتصر محمود شاب معاق حركياً، قال: لنا نحن حلفنا قسم صايمين رمضان من غير كيزان، وحتي نبر بقسمنا ونؤكد للجميع بأن إيماننا بالله وكتبه ورسله واليوم الآخر والقضاء والقدر إيمان نابع من قلوبنا وليس إيمان شعارات لازم نصوم رمضان بالميدان، لنرد علي المشككين في عقيدتنا، وننتصر بالدعاء في شهر الغفران والقبول.
✌الكنداكة حواء أحمد: نحن جاهزين نخدم الثوار بشهر رمضان، ولو نفطر بموية سادة، فالأجر أعظم عند الله، ويا أخوي نحن ما خفنا من رصاص ناس المؤتمر الوطني تفتكر بتخوفنا الشمس.
✌الشاب محمد إبراهيم: أيوا نحن حنصوم رمضان ومعتصمين بالقيادة العامة؛ لأن ثورتنا دي في ناس قدمت أرواحها من أجلها، فواجبنا ألا نفض الاعتصام حتي تحقيق المطالب، وإلا نكون خنا دماء الشهداء، عليه مرحباً برمضان أمام القيادة العامة.
✌ منى يوسف كنداكة صغيرة لم تبلغ العاشرة من عمرها: قالت لنا نحن الشفع ذاتنا صايمين حتي لو نصوم يوم ونفطر يوم، وسنقوم بخدمة الثوار، ونملأ القوارير موية، ونرشهم بيها عشان نرطب ليهم الجو، فديل كلهم أخواننا وأخواتنا وأمهاتنا وآباؤنا ونحن جاهزين لخدمتهم.
✌ جون أكيج من الجنوب الحبيب في أثناء ما نحن كنا نحاور بعض الشباب بجواره طلب أن نسمع له فقلنا له حبابك فما عاش من يفصلنا.
رددها معنا وهتف الجميع بها، ثم قال جون: أنا جنوبي ومسيحي كمان لكن صابيها من أول يوم، فأحترم المسلمين والإسلام وأحب بلدي سودان قالها حتي زرف دموعه وكلنا والحضور ، قال نحن المسيحيين في رمضان نوفر لكم كل سبل الراحة ونعمل الظل ولو نقيف ماسكين المظلات طوال النهار والهتافات خلوها علينا نحن ناس ورية نهار صابنها يعني صابنها ويا ريت يعود الجنوب وجوبا ترجع لحضن الخرطوم، ونعيش أخوان فما في جنوب بلا شمال ولا شمال بلا جنوب.
✌رقيب معاش بالقوات المسلحة: حباب رمضان، ونحن بالاعتصام وأمام مصنع الرجال بدار قواتنا المسلحة رمز العزة والجسارة والصمود ، نصوم رمضان دا والجاي كمان بإذن الله الا تب ما ماشين كان حقوقنا ما جات، وجاهزين ندعم المعتصمين، ونوفر الإفطار من حق معاشنا البسيط. دا نحن نجيب أسرنا هنا، وكل زول يطلع بصينيتوا ونفطر في ضرا واحد.
✌شباب بري الأشاوس قالوها بالإجماع القراصة والعصيدة تطلع من بري على القيادة، ولو كل السودان صايم بالقيادة العامة دا شرف ما بنفات، وديل أهلنا، ودي الساعة الممكن نأكدوا للعالم فيها بأن الشعب السودان شعب واحد، ثم قالوا أي بيت في بري مفتوح للجميع تخش من غير تسأل زول.
تلك كانت بعض الملامح والشواهد وردود الثوار علي استقبال رمضان بالميدان اختصرناها حتي لا نطيل عليكم.
