موكب الحداد

موكب الحداد اليوم خلاص عدى وعبر.

طع السهول مر بالحقول شق الفيافيوعبر البحر.

رايح يعزي في العُزاز م اليوم أوشك للشهر.

لأنه الفراق صعب خلاص للأحبه وطعمه مر.

اليوم فاقوا من صدمه فراق خيرة الشباب… المخلصين الأوفياء.. الصائمون والصائمات الذاكرون الله والذاكرات. في صباح 29 رمضان الماتوا غدر.

على يد مين؟؟ 

من يدعي.. انه شريك في النضال  وانه ثائر وانه حر..

 ماكنا نعلم انه خائن. انه غدار.

انه قاتل.. انه دموي ومن أسوأ البشر.. 

أمس طلع الغريب والعجيب يهدد الشباب

 بأنه لا يسمح ولا يسامح من يخرب… وعيونه تتطاير شرر.. 

بربي من  هو المخرب؟ من هو اس الفساد  من الغجر..؟ 

من يوم سرق  ثورة  (شبابنا) من يوم ظهر الجنجويد ماشفنا خير بل كله شر..

 اليوم موكب حداد ياربي ما ينقص نفر. 

اليوم حداد… ولا كلام مع اللئام وكل كذاب أشر.

 اليوم موكب حداد والشباب حالفين يمين يجيبوا حق الشهداء الماتوا غدر.

 المات بالرصاص.. المات بالحريق. المات بالغرق.. والأغتصاب وتلك من إحدى الكِبَر .

اليوم غليان.. اليوم طوفان مواكب عارمه لا تبقي ولا تذر.. 

اليوم بركان.. اليوم بيان لكل جبان مواكب تدق ناقوس الخطر.

 لمن ولع نار صباح رمضان والناس نيام. والكل نكر..

مواكب حق الشهيد ترعب جيوش الجنجويد.. وتدك حصون برهان و َمجلسه الجبان نفر نفر.

 اليوم  الشباب حالفين يمين يكملوا المشوار… اليوم أمر .

كل شاب صنديد رجال وكل شابه كنداكة قويه بنت الأسد النتر

 وان شاء الله مانفقد عزيز وان شاء الله ماينقص نفر. 

شباب عظيم شباب يشرف شباب ذهب خالص في معصم الزمن..

 شباب لايعرف الخوف مكلل بالعفاف وبالصبر…

دعواتي ليك بالتوفيق والسداد ويا ربي ماينقص نفر.

ووصيتي ليك يالمجلس الدموي خلي المراوغه  والاستعلاء في لاشئ والعنجهيه. سيب الشباب يحكم بلاده  وانت روح شوف ليك مقر.

. شوف ليك طريق طور به نفسك كالجيوش المستنيرة  ما فيش مفر .. 

والجنجويد (دور البابور وولع النور وشوف ليك وزير قرايه يخرجك من الظلمات الي النور والمعافرة مابتجيب كراسي الا في لعبه الكراسي سيدها واحد لا يقدم ولا يأخر)  وفي الحكم ما في ليك مقر. 
٣٠ يونيو 2019