بالبلدي يا حمدوك

تجدون هنا كلاما ظاهره الهزل وباطنه الجد وصلني منسوبا الى السيد/ محمد حنفي حاج الطيب:
رغم المتاريس الوضعوها قدامك، ورغم ان المتأسلمين أورثوك خرينة كإبط النعامة او صحن التوانسة، أعتقد ان نيتك للإصلاح ستساعد بعد الله، لأن النية عكاز سيدها.

نحن نعانى من الغلاء فقط بعد استرداد كرامتنا ووطننا المسروق ..عارف انك محظوظ؟ ربنا ازاح من بنود صرفك ما يسمى بالمجلس الوطني، ومصروفات القصر الجمهوري وغيرها من مهلكات المال. نحن كشعب مصنفين 3 فئات: الاولى الأقاليم، والثانية ناس الخارج المغتربين، والثالثة ناس الخرطوم.

ناس الاقاليم ديل المنتجين وبعد شهر واحد ان شاء الله مشكلتنا محلولة: ناس دارفور وكردفان والقضارف وسنار والنيل الابيض خلاص بدو يحصدو الدخن والذرة والسمسم والفول. وممكن نديك سنة نأكل عصيدة بى روب، ونحلى تبش بى شطه! قصرنا معاك؟ ولحدى نهاية السنه ما عايزين منك حاجة، بعدها صمغ نديك وصادر ضان وإبل نديك.. دولار ننزلو ليك.

ناس الشمالية ونهر النيل ديل ما متاكد من ظرفهم الحالي بس اكيد مشكلتهم محلولة مع الدهب والمغتربين وجروفهم وشوية عيالهم الشغالين فى الحكومة.

اما الجزيرة دى انتظرها شهر بس تخلى ليك الطماطم للصفيحة ب 10جنيه فى الخرطوم/ طماطم وقمح بس بدوك سته شهور ولمن يجى القطن ممكن يدوك 3 سنين، ويدعمو ليك العاصمة بالفائض
يعنى تقدر تقول كل الاقاليم ما عايزين منك اى شيء خلاف تأسيس دولة قانون وبس.

الفئة الثانية المغتربين: ديل والله يستحقوا وسام ابناء السودان البارين ..شيالين التقيلة .. عدالين العوج .. لو ما ساى اقول السودان دا على مدى 30 سنه الفاتو شايلنو الناس ديل؛ كل مسؤوليات الدولة من علاج وتعليم الاسر على كتوفهم، ديل عايزين منك برضو دولة قانون وبس وحايجوك بى خيرهم وعلمهم وشوقهم .

فضل ليك منو؟ ناس الخرطوم، شفت ديل هم المشكلة ومش مشكلتك براك، ديل مشكلة للفئتين الفوق، ديل عايزين رغيف مدعوم وبنزين مدعوم وكهرباء مدعومة، مع انهم ما بنتجوا اى شيء؛ عارفهم كم؟ ثلث السكان يعنى 10مليون نسمه وانا بقول اكثر .

ديل من تصبح الصباح سمسره فى الاوراق والعقارات والدولار والتصاديق وقعاد مع ستات الشاى .. ناس من الله خلقهم عايشين على عرقنا .. بيوتات الرأسمال وعواطلية السياسة.. وعسكر وحرامية وناس مرور وبوليس بلقط.. وناس الامن ديل كمان ثقب اسود.. ديل لو ما صبروا عليك شوية حايخربوا علينا اى شيء، وحيرجعونا تانى لى حكم شمولي ومظالم وحروب.

فى السته شهور الجاية دى وفر لي ديل الرغيف والبنزين، لحدى ما تثبت اركان الدولة المدنية .. تعمل حكم فدرالي اى اقليم ياخد عائد انتاجو: تعليم صحة طرق ووظائف وكهرباء وموية ..، وبعدها طوالى ارفع الدعم ..أيوه ارفع الدعم من الخبز والمحروقات والكهرباء، عشان المساواة فى الظلم عدالة، بعدها ياكلو نارهم ويشوفو ليهم شغلة ..ينتحوا ؛ ان شاء الله يزرعو حيشانهم المليارية دى عجور.

هل تتفق معه في كل شيء أم في جزئيات معينة؟ وبعدين يا ريت فاعل خير يقول لينا “صحن التوانسة دا شنو”.