▪ اخوانيات

♧ مطعم مراد
•• من أين لك هذا يا سيد مراد يا غشاش..؟!صدفة كانت غرامي ..أو رب صدفة خير من الف ميعاد.. اكتشفت ان هذا المدعو سيد مراد واللي يزعم انو تربال ويدعي بان رأس ماله في هذه الدنيا (طورية ومنجل وجلابية دمورية غير بيضه ومكوية) واذا بي بعد مرور عدة سنوات من الغش اكتشف بانة يملك كافتيريا في ارقي موقع في الخرطوم ويدار بواسطة ابنة مفيد ..

اخيرا ظهر الحق وزهق الباطل يا عامل تربال وقاعد علي باب الله
¤ وكان ردي على ود كوره (بس عليك الله ما توري حكاية المطعم لوجدي صالح.. ده انا غلبان..!) ..

• الله يسامحك يا ود كوره يعني انت مصر تفتني مع ناس لحنة التفكيك.. يا اخي انت مالك بتنسى عشرة كم سنه..مالك كده زوول فقري و(فتان)..اهااا خليني اعترف ليك بسر مطعم(مراد) بس روق المنقه وتعال اضرب ليك يوم وجبه كاربه (هوت دوق)..بس حسك بلدينا اللي اسمه(وجدي) يعرف قصة المطعم، ده انا غلبان والزول ده بيقولوا ما بيعرف لف ودوران لو اكتشف فساد( يعني حتي ولو هديه من بشه زي مطعمي) وقالوا ما بيعرف(ارحميني يا يمه)

• لحظى السمح ليله رافقت قريبي الواصل لقعده في مجلس (بشه)وكان (اللمبي) حضورا..وديك كانت ليلة بشه صرف(البركاوي) في حضورنا للخواجيه بتاع بريطانيا.. اهااا بشه اتوجس مني وهددني وقال(يا زوول انت يا المنطط عيونك..الظاهر عليك (اوليد يعني قوال) وما تعمل لي فيها ابوعرام ،وقال لو الكلام ده طلع انو هيسلمني لجهاز الامن للزوول (فلان…)قلت لنفسي [سترك يا رب] ههههه.. المهم اللمبي ما قصر تدخل وطمن بشه وقال ليه زولنا ده غلبان وعشان زول الله ومسيكين انا جبتو ، فاطمأن بشه وجبرا لخاطري المكسور من تهديده ووعيده رمى لي(بقجه) بشق النفس شلتو للبيت.. تصور ما نمت ليلتا لحد الصباح وانا اعد في الدولارات واليورو والين رزم رزم.. وارمي رزم الجنيهات بالشباك للغلابا ،يا زوول ( اتبحبحت اتاريك الدولارات ببخلى الواحد بطران ) ..عملت لي حفله كاربه في فيلا عبد الباسط رغم شيخ علي زعل مني وكان مصر انو الحفل يكون في ضيعته في طرف المدائن وغنى في الحفل (ترباس لمن استطاع اليه سبيلا وتثنت وتمايلت ندي والجبليه) وعزمت ليك بشه اللي حضر رقص كما لم يرقص من قبل.. وفللي سافرت (لكولا لمبور) واشتريت بمساعدة الشيخ علي عماره في شارع السودانيين في قلب(كوالا) قريب من بيت (مهاتير) وفيلا في جزيرة الاحلام في دبي.. وعشان بشه شجعني وقال لي( عشان انت اهلك طباخين معروفين على مستوى العالمين العربي والافريقي لازم اكل هوت دوق من يدك) فقلت له (ابشر سعادتك) ما قريبنا قال لي انو بشه بيموت في المديح.. وفعلا بشه اتكيف من كلامي(ابشر سعادتك) وحلف وطلق بالتلاته (انو ابني مطعم حديث) على حساب ميزانية الدوله بشرط تسميتو المطعم باسم (بشه) او باسم فلانه( يا زول ما تجيب لي هوااا وانا ناقص) وبانتهازية الهتيفه اللي كانوا حول بشه يصفقوا ويهللوا ويدلعوه باسد افريقيا النتر) اهااا انا زاتي اتعلمت منهم النفاق.. ولكين اول ما حسيت بشرارة الثوره ولعت في دمازين وعطبره انتظرت شويه لمن اشتعلت صح قلت لنفسي ( بلا بشه بلا بطيخ) ورحت غيرت اسم المطعم من مطعم (بشه) الي مطعم (مراد)..
•• هذه هي قصة المطعم من( طقطق للسلام عليكم) اهااا بشه ما ضاق نهائي ولا لقمة من (الهوت دوق) من مطعم مراد.. عشان كده ناوي طالما (فلانه بت الفلان) خرجوها من سجن النساء بامدرمان فناوي امشى معاها نودي طبق هوت دوق لبشه وللمبي في كوبر وكان في نيتي
نسوق معانا فرفور و(ترباس) اللي شرد ..عليك الله يا ود كوره وانا عارفك (اوليد) ما توري القصه (لوجدي) واللا ل(مناع).. دا انا غلبان.. !!