مالكم كيف تحكمون-لجان_التحقيق

س: صحي يا نزار يا ولدي لجان التحقيق دي وصل عددها 50 لجنة؟
ج: 50 لجنة دي ياحبوبتي حسب معلوماتي ممكن يكونوا اكتر من كده
س: الخمسين ديل من إستقلال السودان وله من متين؟
ج: ديل بس من يوم سقوط نظام البشير يوم 11 أبريل 2019م ولحدي قبل وقفة عيد الفطر بيوم.
س: منو البشكل لجان التحقيق دي؟
ج: زمان كان المجلس العسكري، وبعدو إنتقل لمجلس السيادة الانتقالي، وممكن رئيس الوزراء كمان يشكل، والنائب العام، والوالي، حتى الوزير ممكن يشكل ليهو لجنة تحقيق.
س: وال50 ديل مافيهم ولا لجنة واحدة طلعت ليها تقرير؟
ج: للأسف يا حبوبتي
س: هل في قانون في البلد بنظم عمل لجان التحقيق دي؟
ج: أيوة، قانون لجان التحقيق لسنة 1954م
س: كدى أديني أمثلة لي لجان تحقيق شكلها المجلس العسكري؟
ج: لجنة التحقيق في أحداث فض الاعتصام في يونيو 2019م، وكمان لجنة التحقيق في مجزرة الأبيض الماتو فيها 6 متظاهرين ضربوهم بالرصاص الحي يوم 29 يوليو 2019م
س: طيب مش في مره اتشكلت فيها لجنة تحقيق مشتركة بين المجلس العسكري وقوى إعلان الحرية والتغيير؟
ج: أيوة يا حبوبتي، دي كانت شهر مايو 2019م، إتشكلت لجنة من العسكريين ومن قوى إعلان الحرية والتغيير للتحقيق في مجزرة ٨ رمضان الماتوا فيها 7 شهداء من بينهم طفل صغير اسمو محمد عيسى دودو الملقب ب(شهيد الترس) ومات معاهو كمان ضابط برتبة رائد.
س: ومجلس السيادة الانتقالي شكل ياتو لجان؟
ج: شكل لجنة للتحقيق في أحداث خور الورل يوم 17 أكتوبر 2019م
س: ورئيس الوزراء حمدوك شكل ياتو لجان تحقيق؟
ج: رئيس الوزراء شكل كم لجنة تحقيق أتذكر منها: لجنة التحقيق المستقلة للتحقيق في جريمة فض اعتصام القيادة العامة يوم 21 سبتمبر 2019م. وتاني يوم 22 فبراير 2020م شكل لجنة تحقيق عليا حول استخدام العنف المفرط ضد المدنيين خلال المواكب السلمية الاحتجاجية الكانت يوم الخميس 20 فبراير 2020م، ولجنة تحقيق تالتة يوم 1 يوليو 2020م، للتحقيق في قمع ناس الشرطة للمتظاهرين خلال المليونية المعروفة بمليونية رد الجميل والمطالبة بهيكلة القوات المسلحة وتضامناً مع الضباط المفصولين من الجيش الانحازوا للثورة، ورابع لجنة تحقيق شكلها حمدوك كانت يوم 25 أغسطس 2020م للتحقيق في الأحداث الوقعت في مدينة كسلا وراح ضحيتها مواطن واحد وأصيبوا فيها 11 واحد بجروح.
س: أها والنائب العام ما شكل ليهو لجان؟
ج: النائب العام المقال والمكلف والحالي كل واحد منهم شكل ليهو لجان تحقيق.
س: المقال ده منو؟
ج: المقال ده مولانا الوليد محمد، كان شكل ليهو لجنة يوم 3 يونيو 2019م، للتحقيق في أحداث فض اعتصام ميدان القيادة العامة ضمت ممثلين من القوات المسلحة والأمن والنيابة العامة.
س: والمكلف ده منو؟
ج: ده مولانا عبد الله أحمد عبد الله شكل ليهو لجنة للتحقيق والتحري وتقصي الحقائق، حول الأشخاص الاختفوا أمام مقر القيادة العامة ودى كانت يوم 23 سبتمبر 2019م.
س: ومولانا تاج السر علي الحبر؟
ج: أول واحدة شكلها مولانا الحبر بعد ما استلم منصبو هي لجنة للتحقيق والتحري في أحداث القتل خارج القانون وانتهاكات حقوق الإنسان وأحداث العُنف الطلابي المُمنهج، وحالات التعذيب والاغتصاب داخل السجون والمُعتقلات من يوم 30 يونيو 1989م وحتى 11 أبريل 2019م، واللجنة التانية كانت للتحقيق في استيلاء ناس الجبهة الاسلامية القومية على السلطة وتقويض الحكومة الديمقراطية ودي كانت يوم 4 نوفمبر 2019م.
س: والأحداث الفي الجنينة دي يانزار يا ولدي مش برضو شكلوا ليها كم لجنة تحقيق؟
ج: أيوة يا حبوبتي، أحداث الجنينة براها إتشكلت ليها كم لجنة، أول واحدة كانت يوم 31 ديسمبر 2019م للتحقیق في الأحداث الشهدتها المدینة یومي 29 و 30 دیسمبر 2019م. وتاني يوم 2 يناير 2020م اتشكلت برضو لجنة للتحقيق في مجزرة معسكر كريندق للنازحين الماتوا فيها 50 واحد ومئات الجرحى ، وبعد كم يوم اتشكلت لجنة تحقيق تالتة للتحقيق في سقوط الطيارة العسكرية الوقعت جنب مطار الجنينة يوم الخميس الموافق 2 يناير 2020، وماتوا فيها 14 واحد.
س: وفي السنة دي مش برضو النائب العام شكل ليهو لجنة تحقيق لأحداث في الجنينة؟
ج: أيوة يوم 19 يناير 2021م .
س: وشرق السودان؟
ج: برضو إتشكلت ليهم كم لجنة تحقيق
واحدة للتحقيق في عقود ميناء بورتسودان والخطوط البحرية، وواحدة للأحداث الوقعت في بورتسودان، وواحدة للأحداث الوقعت في كسلا
س: مش في لجان تحقيق تاني ؟
ج: كتيرة يا حبوبتي، لجنة تحقيق في مقتل الشرطي نزار النعيم فرج الله بالقاهرة، مصنع السيراميك بتاع بحري، ونهب وحرق مقر بعثة اليوناميد، ومحاولة اغتيال رئيس الوزراء دكتور حمدوك، ومجزرة معسكر العيلفون 1998، وشهداء 28 رمضان، وكجبار ، ومفقودي مقر القيادة، ومجزرة أمبدة، وفتابرنو، ومضاربات الذهب وإعادة صادر الماشية من السعودية، وحريق مصنع الذخيرة في الشجرة، ودفن النفايات النووية والطبية، ومكب أبو وليدات للنفايات، ومقتل 4 من طلاب دارفور بجامعة الجزيرة،18 كيلو ذهب وطيارة بدر وووووو
س: ديل كلهم لجان تحقيق بدون تقارير؟
ج: أيوة
س: عاوز تقولي لي آخر حاجة شنو؟
ج: عاوز أقول ليكي شعار ثورة ديسمبر “عدالة” والعدالة دي لسه ما إتحققت يا حبوبتي، وبقى واضح للأسف إنو في تكريس لعدم المساءلة والمحاسبة وفي إفلات من العقاب، عشان كده الأحداث قاعدة تتكرر كل يوم.
س: وتاني عاوز تقول لي شنو؟
ج: ناس باريس والاتحاد الأوروبي والأمريكان قالوها لي ناس الحكومة بوضوح” مافي أي مبرر لخسارة الأرواح في السودان، عاوزين نشوف تحقيقات حقيقية في الأحداث دي” وبس.
سويسرا 15 مايو 2021م