حيطة الجالوص

ولا كلمة ..
أسُكْتي وبس
سكت حِسِّك
يا تنطَمِّي
يا يمرق عليكي الناس
مرق جلدك ..
سمعنا كلامك المعسول
وقفنا على العشم راجيين
وخايفين من وقوفنا يطول
كفانا مطول
كفانا نقول
سمعنا كتير
وقلنا خلاص وصلنا مراحل الإخلاص
وجانا خلاص
ونتفاجأ …….
يضيع عشم العشم مسروق
وكم مطلوق وصل ضمن الجماعة بطل
وكم غلغل
ينظِّر في وضِع مختل
يصالح في حزب منحل
فيا دي المصيبة الجاتنا من قمة سلام مبتور .. هزيل .. أعزل
فلا أهلاً
ولا سهلاً
ولا مبروك عليك هذا الصنيع الشين
جات من وين
وجمَّع شارع المدنية ثوارو
لا اختاروكي تبقي زعيمة
ولا هذا العبث بالأمن إختاروا،
ولا هبشوك محلات الوجع راقد
ولا جاطوك وكت ثاروا
ولا قد سووا كبسيبة
ناس تسرق
كبير جيبا
جواز مرهون
أكيد حتطوِّل الغيبة ..
جواز جاهز على باب السفارة يموت
شنو الآفة ..
شنو الذلة ..
شنو العيبة
أسُكْتي وبس
سكت حِسِّك
أقعدي هناك مع باقي الفضايح فيك وإنستري
وغطغطي ما انكشف من قصَّتك في السوق
بلاش خازوق
وراسمال الفساد ذمة
على طاولة كتيبة قوية تتشكَّل
تقرِّر تدخل الغابة وتمرق من هناك تاتشر وحملة موت وقُفة شحدة للنازحين ..
صحي القادر بسوِّي كتير
شنو التحرير
فريق نزل اللعب ناقص فقد كم فرصة للتغيير
لذلك أبدى مشروعك إذا بالدس لقيتي وزير ..
جديدة عليك
بدون مكياج
كلاش وعجاج
مع الأفواج
مريض محتاج
نزف من ما عليهو الدم
وشيك وقَّعتيهو دون تدري الرصيد كان كم
طلعتي تقيلة
واستنفدتي مخزون الأدب تزييف
فكيف كانت رواية سِيرتك الممجوجة حيث رداءة التأليف
حيث الفوضى تتهادَى وترفض في تحدِّي تقيف
حيث الشرطة تتراخَى ويشد حبل المسيرة كفيف
حيث اللجنة تتوافق على وصف الحرامي حريف
حريفة خلاص
حسابك خاص
على باب مكتب مدير دهب الأهالي الماتوا مغبونين
وماتوا بدون يلاقوا حبيب
هناك في البعزقة الحاصلة جهار في حفلة التنصيب
تعالي قريب
عشان يدوكي حق العيش حسب ميزانية التجنيب
حسب ما زاد من التهريب
حسب ما إنتي قايدتنا وأخوكي التاني في الترتيب ..
أسُكْتي وبس
سكت حِسِّك
ولا كلمة
قدُر تتأسف الكلمات تلاقيك أدنى من كضبة
قدُر تتأسف مليشيات الأسف تنسف
عيال تخطف
حشود تهتف
بدت ترجف
بلد ينزف
قَدَرنا كدا
سلام منقوص
فليه يا حيطة الجالوص
يفيض النيل ولطينة ضرانا يموص
وليه يا حيطة الجالوص
كل ما الضو يدق بابنا يغوص فينا الضلام ويغوص
وليه يا حيطة الجالوص
ينط كل يوم علينا من المعانا لصوص
فلا حرم البيوت يمنع
ولا شرف القَسَم يشفع
ولا مَن قَسَّم وثيقة الخوف وشال حقو صَدَق فعلو
ولا مَن قال بيحمينا وقف صرَّح
أشار بالأصبع الوسطى إلى بيت الخليفة الحَيْ
وأذَّن في نواحي الحَيْ
حرام والله يا ريِّس
إذن أنزل وإتنازل
وبدِّل بدلتك وارتاح
بدل تقبل تكون في موقع السفَّاح
بدل تقبل تشيل النوم
وتهدي إلى العصابة سلاح
بدل تتهردم الأوضة ويقوم جيش السيول يجتاح
بدل تنشف عصيدتنا ونكوس من برَّا ليها مُلاح ..
أسُكْتي وبس
سكت حِسِّك
ولا كلمة..
منو البقدر بعد ما سالت الدمعات يناديكي
ويسمع في الإذاعة بيان
ومارشات الجنود العادوا من رحلة هواية صيد بني الإنسان
ومبسوطين
وشايلين باقي الخريطة على كتف الوطن تبكي إلى متحف هيئة الأركان
بعد بقت الهوية أسى
وتسوقنا في جدل الهوية أضان ..
أسُكْتي الآن
سكت حِسِّك
بعد هذا الصبر كله يجينا على العلالي هوان
يمد من العلينا لسان
كيس فاضي
وكيس يا ريتو لو مليان
أسُكْتي الآن ….
أسُكْتي الآن ….
أسُكْتي الآن ….
سكت حِسِّك..
………
…………………..
………….
ولا كلمة.

الرياض