هَبّـة التغـيير

يلا نطلع..
يلا يا شعبي المناضل
يلا يا أشجع مقاتل
يلا أجمع..
يلا في كل الشوارع
خلي كل الدنيا تسمع
صوت هديرك
ونم نفيرك
يا غضب إعصارو ولّع
الخلاص حان انفجارو
والحوارات ما بتنفع
نحن ماشين في مسارو
ما في واحد فينا بركع
تاني للخوف والمظالم
للمذلة وللمحاكم
لانقلاب خاين ومدفع
خلي عصيانك سلاحك
وانزع الهم من جراحك
يبقى حجم الدنيا أوسع
لانتصارك
والنجوم الفي مدارك
نشتل الآمال ونزرع
كلمة الصدق الأمينة
واستراتيجية زينة
تبقى لي أطفالنا منبع
نرفع التغيير شعارنا
ونبني في الأعماق ثباتنا
وكل حارة عليها مصنع
وكل بيت نرويه تقوى
وكل زاوية وحوش مُربّع
وكل إنسان عز كرامته
بيك تسمو وتبقى أنصع
مافي سارق باسم دينا
أو متاجر بي يقينا
تاني بقبع
في روابينا وطريقنا
إلا يتفجر حريقنا
من كبير
للسة برضع
ويبقى خط النهضة سيرنا
لا عصابات ناهبة خيرنا
لا محافل لا مآتم
ليك بتشفع
كل أركان العوالم
مهما إزدانت معالم
إنت يا سودانا أروع
وما في غيرك
إنت أروع.

معز عمر بخيت