مع إنك…!!
مع إنك…!!
مسكين ومحروم ومنكوب من سعى لسلطة وجاه وكرسي على حساب شعبه وغصباً عن إرادته وفوق أحلام شبابه و أجسادهم …
يعتقد أن الحياة مكيف ( لاندكروزر ) وحرس واقف قدام الباب ……وعربية حكومة تودي الأولاد المدرسة
وتجيب أولاد ( خالتم ) يلعبو معاهم ( البلايستيشن )
وجواز سفر أحمر
وإذا كان من جماعة ( VIP طويلة ) ولديه ميول ( عقاريه ) فلامانع من ( دولارات ) يقمن بها صلبه …
و ( كريدت كارد ) يغزو به اسواق ( الفرنجة ) ….
وشقة صغيرة تطل على ( البسفور ) والكبيرة في
لندن ….!!
السودان ليس ( البرتغال ) يا هذا ….!!
والخرطوم ليست ( روما )
ستعيش مطارداً تلاحقك لعنات الناس ودعواتهم ….
وستكون معزولاً من الأحباب موصولاً بالأغراب
وقتها سيضيق عليك هذا البلد الفسيح ….
وتقفل الأبواب
ستشتهي لفة في شارع الجمهورية ….
ودعوة صادقة إذا مسك سوء …..وزيارة بيتكم الكبير دون استحقار شفع الحلة القاعدين تحت الشجرة
ونومة ضهرية تشوف فيها أمك….!!
السودان أكبر من هذا الكرسي ياصاح و يا حسرة القلب الرهيف
السودان لمة ناس وعز أهل وونسة جيران !!
عرق الناس ….ومكابدات أسر ….وتضحيات يتامى
وأسرار بيوت …..!!
السودان شعب حر بالميلاد سيد نفسك مين الأسياد
يرفض الظلم والحقارة جينياً ….
بحب الناس مسالم …!! لا بيركع لا بساوم
أحذره إذا غضب .
يفتديك إذا رغب … وحدثتك حديث الروح
يذوب في ( ضنين الوعد ) ويحلق مع ( صقيرا الحام )
ود ادريس أبوي ماصع الضمر بالرق …..
إدريس مدفع الترك الذخيرته تبق
السودان ناس الفاشر الطلعو وهتفو متجاوزين من يتحدث باسمهم الي وطنهم الأكبر دمهم ولحمهم في رحلة التجلي والعبور …
السودان تلكم الجالية الصغيرة التي تعاني وهم في بلد يعاني ….ورغم ذلك خرجوا ولوحوا بأعلامهم وهتفوا من بيروت …
السودان عيد الضحية في الحلة والجذور مهما ارتفعت
عمارات المهندسين والطايف ..ومدينة النيل
التي يملكونها لكن أشواقهم مدفونة هناك ….!!
السودان مغتربين أقصى تماس أمنياتهم ضحكة يرسمونها على شفاه أهلهم بالداخل …
السودان مقالدة ومطايبة ومواجبة ………..وعشرة الأيام 🥰
تخلي ديل وتختار الهجير …
المشكلة الكرسي بمشي وبنكسر ….إنت تاني البجبرك
شنو …..!!!؟؟
دعها فقد تأتيك طائعة مختارة من سيد الكرسي والله بدي الجنة
ياريت من أول وريتنا
شوف وين روحتنا وديتنا …!!!
وشوف ..
مع إنك….!!😢
جميلٌ أنت أيها الرائع كروعة أهل السودان الشرفاء.. وخاسرٌ هذا الإنقلابي وكل من شايعه في هذه المحاولة الفاشلة لإعادة الكيزان من الباب الصغير.. وشعبنا المفرد السلمي الواعي له ربٌّ يحميه من كل خائنٍ وظالمٍ وكذوب.
جميلٌ أنت أيها الرائع كروعة أهل السودان الشرفاء.. وخاسرٌ هذا الإنقلابي وكل من شايعه لإنجاز محاولته الفاشلة والبائسة لإعادة “الكيزان” وإخوان الشيطان من الباب الصغير لمواصلة نهب ثروات بلادنا، وحماية الفساد وأصحاب النفوس المريضة للتشفي من أهلنا وقتل أبنائنا وبناتنا.. ولشعبنا المتفرد الصامد ربٌّ يحميه من كل خائنٍ وظالمٍ وكذوب.