مجازفة
مجازفة
——-
يا والدنا ما تهتم ……. بتتجازف
وما تشيل هم
إذا هذا الزمن أشقاك
إذا ليك الزمن ناكَف
إذا ليك الفرح أوعد
وعاد عند المطر خالَف ..
بتتجازف ..
عشانك إنت يا سيدي حتتجازف
وليكم إنتو يا غاليين
كبارنا وفينا تاج الراس حتتجازف
بتتجازف
صحيح إنه الوضع مأزوم
على كل الوطن طبعاً
وبالتأكيد على الخرطوم
وكم محروم
برغم الحال
كما الأبطال
تقدَّم وقال : – يا حلوين – بتتجازف
صحيح صار الأمان معدوم،
حريق ياكل تخوم وتخوم،
وسيرة الأزمة صاحية تحوم
وتتراجَف
ونتراجَف
سيول تجرف مساحاتنا
وهموم من فوقنا تتكاثف
ويتقاذف مصيرنا فشل ونتقاذَف
تزيد أوجاعنا تخنقنا
ونأمَل إنو تتلاطف
وما من حد بيتعاطف
ولكن قول بتتجازف
نخت إيدينا نتوحَّد
نمد خطوتنا نمشي بعيد .. وبل أبعد
إلى جهة الصباح نسعَى
طلوع شَمْس السلام نشهد
يكون الضو هدفنا سوا إلى آخر نهاية الحد
وبل أبعد
ونبني وطنا …. يتجدَّد
ونتجدَّد
حباب ميرم
حباب سوماي
وبت عبود
حباب عسجد
ونتجدَّد
حباب اسحق
حباب أوشيك
حباب ساتي
وحباب أحمد
ونتعارف
ونتآلف
ونتحالف
نخت إيدينا فوق إيدينا نتكاتف
إذا موعدنا والأفراح بدا وشارَف
نشيل لقمتنا دون ما نحنَ نتخاطَف
ونتشارك كتاب المعرفة المفتوح على الدنيا
ونتثاقَف
يعم نور العِلِم يسطع ويتلاصف
حلمنا يزيد
يزيد ويزيد … ويتضاعَف
نِشَيِّد روضة للأطفال
ومدرستين ومستوصَف
وجنبو علمنا
ما أحلاهو – لو رفرف
ونتكاتف
نِصَفِّي نفوسنا من الغِل .. ونتكاشَف
سلاح الوعي يحرسنا .. ونتحدَّى
ونَصِر ونقول بتتجازف
بنعرف كيف بتتجازف
ومؤكد إنو تتجازف
وتتجازف
….
….
عشانك إنت يا سيدي حتتجازف
وليكم إنتو يا غاليين
كبارنا وفينا تاج الراس حتتجازف
وعشان هذا الوطن ينهض حتتجازف ..
………..
………..
بتتجازف.
_____________
محمد حسن الشيخ
