الفاتحة التكتل أم أهلكم

الفاتحة دي طبعا عادة سودانية وفي ناس بيقروا فيها سورة الفاتحة وفي ناس بيقروا الاخلاص وفي ناس بيدعوا للميت وفي ناس برفعوا يديهم ساي كده نظام تقليد اجتماعي
و مرات بيكونوا سارحين في بنا المرحوم …
السيد الرئيس اليوم مشي فاتحة المرحومة اليزابيث التانية و سبحان الله علماء السلطان مافي زول قال حرام وللا حلال … ومافي زول قال لا يجوز الترحم علي الكافرة بنت الكفار _ _ انا شخصيا ما عندي موقف من التعزية في الكنيسة و لا مرة ولا مرتين مشيت واصحابي كتاااار أقباط بمشي طواااالي اعزيهم ومرات كمان برجع اعاودهم … بس و الله حرقتني شديد العلماء الكان شنانين حملة ايام وفاة شيرين ابو عاقلة و قالوا لينا كيف تترحموا علي كافرة اليومين دي ساكتين سكات يحيرك … سبحان الله شيرين ماتت وهي تدافع عن بيت المقدس وناس جبل دهب من أجل غزة يهاجموا فيها. وهم شالوا الدهب و تركيا جاك صحابي …. ربنا يرحمك يا شيرين ويغفر ليك لانه في ناس متخيلين الرحمة دي بالمعتقد و الطوائف الدينية…..
خلونا من حلال وحرام دي بتدخلنا في نقاشات لكن شينة منكم يا ناس( التكفير و الشهرة )…
خلونا في فاتحتنا بتاعة الجزيرة وطقوسها الفاتحة دي بالمقامات كل زول بتفاعلوا معاه حسب وضعه لو انت زول مهم ناس الفراش كلهم بقوموا يشيلوا معاك الفاتحة ولو زول (فلقاي ) ساي زي حالتي و كده احتمال ود المرحوم يقوم علي حيله يشيلها معاك ليس احتراما لك ولكن إكراما للمرحوم . _ هسا السيد الرئيس مع رؤساء الدول طلع فلنقاي ساي وكمان الشفاته بتاعين لندن منتظرنه في اللفه عشان يعملوا الزفه
عليكم الله خلوهو ما تزفوهوا ما عشانه بس عشان العالم ما يقول الخواجات في شنو و السودانيين في شنو
__ رويترز ذاتها ما قصرت جابت كشف باسماء رؤساء الدول التي شاركت في عزاء الملكة و عندما ذكرت البرهان قالت قائد الجيش و تعمدت أن لا تقول رئيس السودان و طبعا من هنا الموضوع خستك وبقي (اجر و صل ) زي ما بنقولوا في حفر القبور وان شاء يا السيد الرئيس ربنا يجعلها ليك في ميزان حسناتك… ونعتبرها ليك جدعة كده من جدعاتك من أجل الوطن
ما انت المنقذ للوطن و حقيقة انت الوطن ذاتووووو..
اها الزول الفلنقاي قريبنا ركب حماره و مشي الفاتحة و لما وصل لقي المرحوم دفنوهوا و ناس اللاندكروزرات و البرادوهات فطروا و اتخارجوا و حتي ناس الهايسات قبلوا راجعين حلًالهم و فرقانهم وقاااتل الله الفقر و ملعون ابو الدراهم التي تكسي الرجال مهابة و مقالا…
فهي اللسان لمن اراد فصاحة
وهي السلاح لمن اراد قتالا ..

صحابنا نزل من حماره ورفع الفاتحة زول قام لي فوق مافي …
حقارة جد الراجل فلنقاي ساي البشتغلبو منو … لما خلاص كثافتو جات جدع عصاته من تحت اباطه و قال ليهم (( الفاتحة يا ناس الفاااااااتحة التكتل ام اهلكم ))…طبعا قالها وهو باسط يده كما قالها لنا بروفسور التجاني حسن الامين ذات يوم …
كل الناس القاعدين في صيوان العزاء قاموا صفا إنتبااااه __ ناس خايفين وناس كتموا الضحكة و هم عارفين الفلنقاي وصل مرحلة متأخرة و لو شال العصاية دي وقبل عليهم امكن يلحقهم المرحوم ….
عليكم الله نحن ناس مساكين أن جيناكم في فاتحة ما تحقرونا عشان نحن لسانا اكعب من الفلنقاي وعارفين الفاتحة بالمقامات لكن الناس الفي مقامنا الحقارات منكم ما مقبولة ..
الملك شارلز ما تنسي الواجب و نحن جاينكم بي حقنا و بيناتنا نسب .. والنسيب عين شمس ذي ما بقولوا …. بتنا ( راشيل ماركيل ) اخدها ولدكم الأمير هاري… دي بنت خالتنا لزم ونحن جينا نعزيكم و نعز بتنا وقالوا ( عز الحريم وليان وعز الجلد قطران ).
اها فتكم بي عافية و ان شاء الله نتلاقي في سماية بت عمنا بايدن .

والعاقبة عندكم في المسرات .

د احمد الطيب إبراهيم
استشاري جراحة الكلي والمسالك البولية