ما لكم كيف تحكمون: الطريق إلى لاهاي (1ــ 3)

س: شكلوا التاريخ بعيد نفسه يانزار ياولدي في الإنتهاكات الفظيعة القاعدة تحصل الأيام دي في بلدنا؟
ج: كلامك صاح ياحبوبتي، أصلو لمن تكون هيبة الدولة غائبة، والعدالة نايمة، والإفلات من العقاب يصبح ظاهرة، أكيد الإنتهاكات كمان حتستمر.
س: والحل شنو؟
ج: الحل نفتش على العدالة خارج بلدنا
س: وين؟
ج: في لاهاي وفي مدن تانية في العالم
س: لاهاي دي فيها شنو؟
ج: لاهاي فيها مقر المحكمة الجنائية الدولية
س: والطريق للاهاي دى سالك وله فيهو مطبات يانزار ياولدي؟
ج: حقيقة فيهو مطبات يا حبوبتي، لازم الناس تعرفها من بدرى، حأحكي ليكي عنها بعد شوية
س: ومحكمة لاهاي دي مختصة في شنو؟
ج: مختصة في محاكمة المجرمين المتهمين بإرتكاب 4 جرائم ياحبوبتي
س: والجرائم الأربعة ديل هم شنو يانزار ياولدي؟
ج: جريمة الحرب، والجرائم ضد الإنسانية، وجريمة الإبادة الجماعية وجريمة العدوان .
س: والإنتهاكات القاعدة تحصل في بلدنا دي، مش ضمن الجرائم الأربعة ديل يانزار ياولدي؟
ج: أيوة يا حبوبتي، القاعد يحصل ده جريمة حرب، وجرائم ضد الإنسانية وكمان جريمة إبادة جماعية
س: ممكن تشرح لي كل جريمة شوية شوية عشان أفهم معناها؟
ج: حاضر ياحبوبتي، وأبدا ليكي بجريمة الحرب، القتل العمد القاعد يحص الأيام دي في الخرطوم وفي ولايات السودان المختلفة ده جريمة حرب، والتعذيب والمعاملة اللاإنسانية ده جريمة حرب، وتدمير الممتلكات والاستيلاء عليها بدون مبرر عسكري برضو جريمة حرب، وحرمان الأسير من حقه في محاكمة عادلة جريمة حرب، والإبعاد أو الحبس غير المشروع، جريمة حرب، و ضرب السكان المدنيين الما مشاركين في الحرب الدائرة في البلد دي برضو جريمة حرب، و تعمد توجيه هجمات ضد مواقع مدنية جريمة حرب.
س: للأسف الشديد يانزار ياولدي الجرائم دي كلها حاصلة الأيام دي في بلدنا، في جرائم تانية ممكن نقول عليها جرائم حرب؟
ج: أيوة يا حبوبتي، تعمد شن هجمات ضد الموظفين الشغالين في العمل الإنساني أو المنشآت أو العربات المستخدمة في توصيل المساعدات الإنسانية برضو جريمة حرب، واستهداف الموظفين الشغالين في قطاع الكهرباء وقطاع الاتصالات والموية برضو جريمة حرب، و الجهة البتشن هجوم وهم عارفين إنه الهجوم بتاعهم ده حيقتل ناس وحيسبب إصابات وسط المدنيين برضو ده جريمة حرب.
س: وتاني؟
ج: مهاجمة أو قصف المدن أو القرى أو المساكن أو المباني الما عسكرية، برضو ده جريمة حرب، و قتل أو جرح مقاتل استسلم مختاراً ورمى سلاحه وما عنده وسيلة تانية للدفاع عن نفسه برضو دي جريمة حرب، و تعمد توجيه هجمات ضد المساجد والمدارس والجامعات والمتاحف والمستشفيات والمراكز الطبية برضو دي جريمة حرب، ونهب البيوت والدكاكين والمصانع والشركات والبنوك برضو جريمة حرب.
س: وشنو تاني ممكن نقول عليها جريمة حرب؟
ج: الاعتداء على كرامة الشخص والمعاملة المهينة والحاطة بالكرامة، برضها جريمة حرب، و اغتصاب النساء والفتيات برضو جريمة حرب، وتعمد تجويع السكان المدنيين وتعمد عرقلة وصول المساعدات الإنسانية للمتضررين برضو جريمة حرب، والتجنيد الإلزامي للأطفال الصغار تحت سن 15 سنة عشان يشاركوا في الحرب برضو بنقول عليها جريمة حرب.
س: كلامك واضح وصريح يانزار ياولدي، يالله أشرح لي بنفس الطريقة دي، شنو يعني جرائم ضد الإنسانية؟
ج: القتل العمد، الإبادة، السجن، التعذيب، الاغتصاب، الاختفاء القسري، الأفعال اللاإنسانية التي تتسبب عمداً في معاناة شديدة أو في أذى خطير يلحق بالجسم أو بالصحة العقلية أو البدنية، الهجوم الموجه ضد أية مجموعة من السكان المدنيين، الحرمان من الحصول على الطعام والدواء، بقصد إهلاك جزء من السكان، الاسترقاق، إبعاد السكان أو النقل القسري للسكان من منطقة لمنطقة تانية دي كلها تعتبر جرائم ضد الإنسانية.
س: شنو يعني إختفاء قسري؟
ج: يعني مجموعة مسلحة تقبض ليها شخص أو تحتجزه أو تختطفه، وبعدين ترفض الإعتراف بحرمان هذا الشخص من حريته أو تقديم معلومات عن مصيره أو عن مكان وجوده بهدف حرمانه من حماية القانون لفترة زمنية طويلة.
س: وجريمة الإبادة الجماعية دي بتحصل كيف؟
ج: ميثاق روما الأساسي بتاع المحكمة الجنائية الدولية، قال في تعريف الإبادة الجماعية: أي فعل من الأفعال دي يرتكب بقصد إهلاك جماعة قومية أو إثنية أو عرقية أو دينية إهلاك كلي أو جزئي يعتبر جريمة إبادة جماعية:
قتل أفراد الجماعة؛ إلحاق ضرر جسدي أو عقلي جسيم بأفراد الجماعة؛ إخضاع الجماعة عمدا لأحوال معيشية يقصد بها إهلاكها الفعلي كليا أو جزئيا؛ فرض تدابير تستهدف منع الإنجاب داخل الجماعة؛ نقل أطفال الجماعة عنوة إلى جماعة أخرى.
س: يعني ممكن نقول قتل أفراد من قبيلة المساليت في غرب دارفور دي إبادة جماعية؟
ج: ممكن
س: وآخر جريمة بتقع ضمن إختصاص محكمة لاهاي هي شنو؟
ج: جريمة العدوان
سويسرا 26 يونيو 2023م