ما لكم كيف تحكمون؟: لنزوح والهجرة: بين فشل الدولة وعجز المجتمع الدولي (1)

س: 100 يوم مروا الليلة يانزار ياولدي على الحرب المدورة في البلد بين القوات المسلحة وقوات الدعم السريع وفلول الجبهة الإسلامية القومية، الحصيلة شنو؟
ج: موت اعداد كبيرة ياحبوبتي تقدر بالآلاف من خيرة أولادنا وبناتنا مدنيين وعسكريين، تدمير ونهب للبيوت و للمصانع والمتاجر حتى المستشفيات والمساجد والمطار الرئيسي تم تدميرهم، مش كده وبس كمان مباني السفارات الأجنبية والمنظمات الدولية بدون أي مراعاة للقانون الدولي لحقوق الإنسان وللقانون الإنساني الدولي.
س: والمجتمع الدولي وين يانزار ياولدي؟
ج: المجتمع الدولي بعد ما عملوا إجلاء بنجاح لمواطنيهم من الخرطوم، للأسف الشديد يا حبوبتي لحدي اللحظة دي عاجزين حتى على إقناع الطرفين بالتوصل لهدنة بدون خروقات عشان يوصلوا خلالها المساعدات الإنسانية، ناهيك عن وقف دائم لإطلاق النار والبدء في مفاوضات سياسية تفضي لتشكيل حكومة مدنية.
س: رغم كل الإجتماعات دي؟
ج: أيوة رغم الإجتماعات الكتيرة دي في جده برعاية المملكة العربية السعودية والولايات المتحدة الأمريكية، ورغم إجتماعات أديس أبابا برعاية الإتحاد الأفريقي ومنظمة الإيغاد، ورغم الإجتماعات الأخيرة لدول جوار السودان التمت قبل أيام في القاهرة، حتي إجتماعات مجلس الأمن ياحبوبتي في نيويورك ما جابت أي فائدة لحدي اللحظة للشعب السوداني.
س: صحي الطرفين يانزار ياولدي ما عندهم رغبة في وقف الحرب دي؟
ج: أيوة، والدليل 100 يوم مروا والحرب بينهم لسه مدورة
س: عندي ليك يانزار ياولدي أسئلة كتيرة عاوزاك تجاوب لي عليها عشان أكون فاهمة الحاصل شنو، مثلا قاعدة أسمع الأيام دي ناس بقولوا السودان أصبح “دولة فاشلة” وناس بقولوا السودان “دولة منهارة” معناهم شنو الكلمتين ديل؟
ج: مفهوم الدولة الفاشلة حسب دراسة نشرت في مجلة السياسة الخارجية الاميركية، الدولة الفاشلة هي الدولة الما بتقدر تلعب دورها ككيان مستقل، وناس تانين قالوا عليها هى الدولة البتحكمها الميليشيات المسلحة، وناس تانين قالوا هي الدولة التي تفقد السيطرة على وسائل استخدام العنف، وعاجزة عن تحقيق السلام والاستقرار لشعوبها، وعاجزة أو تتغاضى عن فرض السيطرة على أراضيها أو عن جزء منها.
والدولة المنهارة، هي التي لم تعد قادرة على القيام بوظائفها الأساسية تجاه مواطنيها.
س: ممكن تشرح لي أكتر عن الدولة الفاشلة؟
ج: يعني الدولة الما قادرة توفر الخدمات العامة، وماقادرة تسيطر على مفاصل البلد، تآكل السلطة الشرعية بداخلها، لدرجة انها عاجزة عن اتخاذ قرارات موحّدة، فقدان مصداقية نظام الحكم، وتعطيل أو تعليق تطبيق حكم القانون وانتشار ممارسات انتهاكات لحقوق الإنسان، وتنامي حالة من ازدواجية المسؤولية الأمنية، بحيث تتمتع جهة بسلطة تضاهي سلطة الدولة، ووجود حالة من عدم الاستقرار السياسي، خصوصاً على المستوى المؤسساتي، وتزايد حدّة التدخّل الخارجي، سواء من جانب دول أو فاعلين من غير الدول.
س: شكرا ليكي يانزار ياولدي، كلامك واضح شديد، سمعت في الأخبار برضو قاعدين يقولوا اكتر من 3 ملايين من السودانيين والسودانيات طلعوا من بيوتهم بسبب الحرب مرة يقولوا عليهم “نازحين”، ومرة “مشردين” ،ومرة “طالبى لجوء” ، ومرة كلمة “لاجئين”، ومرة بقولوا عليهم “عالقين”، عاوزاك يانزار ياولدى تشرح لي الفرق شنو في التسميات دي؟
ج: حاضر يا حبوبتي بشرح ليكي كل كلمة معناهو شنو عشان تقدرى تفرقي بين كل واحدة والتانية؟
خلينا نبدأ أول حاجة ياحبوبتي بكلمة “نازحين” وكلمة “مشردين”، الكلمتين الاتنين ديل ياحبوبتي هم ذي بعض، معناهم واحد وبقولوهم دائما على الناس الطلعوا من بيوتهم لكن لسه قاعدين جوه بلدهم ما طلعوا لبلد تاني بالإنجليزي بقولوا عليهم “internally displaced persons”.
س: عشان كده بقولوا عليهم نازحين ومشردين داخليا؟
ج: أيوة داخليا يا حبوبتي
س: طيب وديل هم منو؟
ج: النازحين ديل ياحبوبتي، الناس الطلعوا من بيوتهم لمناطق تانية جوه بلدهم بسبب الحرب والقصف الجوى والعنف والانتهاكات المستمرة لحقوق الإنسان.
س: يعني أولاد شيخ الزين الطلعوا من بيتهم في بيت المال ومشوا لاهلهم في الثورة بقولوا عليهم نازحين داخليا؟
ج: أيوة
س: وبنات خالتك الطلعوا من أمدرمان للقضارف؟
ج: أيوة
س: وأولاد جارتنا ست البنات المشوا من الخرطوم لأهلهم في الشمالية في دنقلا برضو بقولوا عليهم نازحين؟
ج: أيوة يا حبوبتي
س: وأولاد حاج البشير القاعدين ليهم شهرين في معبر أرقين على الحدود المصرية؟
ج: ديل بقولوا عليهم ياحبوبتي كلمتين نازحين وعالقين
س: طيب يانزار ياولدي، الدبلوماسيين الأجانب الكانوا ساكنين في الخرطوم ومشوا بورتسودان وفتحوا سفاراتهم هناك، ديل برضو بقولوا عليهم نازحين؟
ج: الدبلوماسيين الأجانب ديل ما بنقدر نقول عليهم نازحين يا حبوبتي، لأنهم أصلا ما من مواليد وسكان الخرطوم
س: طيب بنات عمتك عشة السافروا مصر، ديل برضو بقولوا عليهم نازحين؟
ج: بنات عمتي عشة ما نازحيين، ديل الكلام عنهم كتير، بكلمك عنهم بعدين.
س: طيب هل النازحين ديل عندهم نفس الحقوق بتاعت باقي المواطنين؟
ج: أيوة.
س: عندك فكرة يانزار ياولدى النازحين ديل عددهم وصل كم في العالم؟
بكرة نواصل
سويسرا 23 يوليو 2023م

https://www.facebook.com/nazaras/posts/pfbid0212PdvAvfbXLK5xLEdChyxZYSQWodm2me1XR1KaFB4ZnzAAfS53w1NA3gGffxGfC7l