ما لكم كيفت حكمون؟ النزوح والهجرة: بين فشل الدولة وعجز المجتمع الدولي (2)

س: في الحلقة الفاتت وقفنا لمن سألتك يانزار ياولدي عن عدد النازحين والمشردين داخليا في العالم؟
ج: مفوضية الأمم المتحدة لشؤون اللاجئين UNHCR نهاية سنة 2021م قالت عددهم 90 مليون شخص.
س: موجودين في ياتو دول؟
ج: موجودين في دول كتيرة ياحبوبتي، بس الغالبية في إثيوبيا ، بوركينا فاسو، ميانمار، نيجيريا، أفغانستان وجمهورية الكونغو الديمقراطية.
س: وتاني؟
ج: في أكرانيا وروسيا عددهم براهم أكتر من 8 مليون شخص.
س: وعددهم في سنة 2022م؟
ج: مفوضية اللاجئين UNHCR في تقريرها بتاع سنة 2022 ، قالت عدد النازحين والمشردين داخليا وصل 108.4 مليون شخص.
س: معناها الآن ونحنا في نص 2023م بكون عددهم تاني زاد، صاح يانزار ياولدي؟
ج: فعلا ياحبوبتي، قبل شهرين (مايو) 2023م، ناس المفوضية قالوا عدد النازحين والمشردين داخليا بسبب الحرب في السودان زاد ووصل ل 110 مليون شخص.
س: والنازحين والمشردين بتاعين الدول التانية مالهم طلعوا من بيوتهم؟
ج: طلعوا برضو بسبب الصراعات في بلدانهم أو الاضطهاد أوالتمييز أو العنف، أو بسبب تأثير تغير المناخ.
س: وحماية النازحين والمشردين داخليا ديل مسؤولية منو يانزار ياولدي؟
ج: الحكومة
س: وإذا مافي حكومة في البلد؟
ج: بتكون في رقبة الأمم المتحدة والمنظمات الإقليمية والدولية
س: ناس الأمم المتحدة ديل عندهم إتفاقيات أو مواثيق لحماية النازحين والمشردين داخليا؟
ج: تصدقي يا حبوبتي لو قلت ليكي، واحد سوداني هو الكتب لناس الأمم المتحدة المبادئ التوجيهية الخاصة بالنازحين والمشردين داخليا.
س: ده منو السوداني ده يانزار ياولدي؟
ج: بروفيسور فرانسيس دينق
س: ناس كتار يانزار ياولدي ما بعرفو فرانسيس ده، ممكن تحكي ليهم عنه شوية؟
ج: حاضر يا حبوبتي، فرانسيس دينق من مواليد مدينة أبيي سنة 1938م، أبوهو مادينق دينق مجوك ناظر عموم قبيلة دينكا نقوك. درس الإبتدائي والمتوسط في ابيي ودرس الثانوي في مدرسة خور طقت بمدينة الأبيض ، وبعدين دخل كلية القانون جامعة الخرطوم وإتخرج منها سنة 1962م، أخد الماجستير سنة 1966م والدكتوراة سنة 1968م من جامعة ييل في الولايات المتحدة الأمريكية.
س: مدرسة خور طقت دي ياريت كمان يانزار ياولدي لو تحكى للناس شوية عنها؟
ج: مدرسة خور طقت كانت واحدة من بين أعظم تلاتة مدارس ثانوية للأولاد في السودان معاها “مدرسة حنتوب ومدرسة وداي سيدنا”، تم إفتتاحها سنة 1951م، وأجمل ما فيها أنها كانت بضم الطلاب من مختلف ولايات السودان من الخرطوم، الجزيرة، كردفان، دارفور، جبال النوبة والنيل الأبيض وشرق السودان وجنوبه، والمدرسة كان شعارها شجرة التبلدي “القونقليز”.
إتخرجوا من مدرسة خور طقت ناس كتار لعبوا دور كبير في الحياة السياسية والثقافية، والأدبية والفنية والإجتماعية والرياضية في بلدنا.
س: ذي منو؟
ج: بروفيسور ادريس البنا، والرئيس المشير عبدالرحمن سوار الذهب، وزير الدفاع الفريق عبد الماجد حامد خليل، الشاعر فضيلي جماع ، السفير الشاعر محمد المكي ابراهيم ، حسن أبو العائلة ، كمال شداد، فتحي احمد علي، البروفيسور محمد عبدالله الريح ، دكتور عبدالله حمدوك، الفاتح بشارة، كمال حمزة ، بكري عديل، دفع الله الحاج يوسف، بروفيسور عبد الرحمن موسي، دكتور آدم محمود مادبو، الشاعر السر دوليب، الشاعر الحسين الحسن، الدكتور عبد السلام صالح، صلاح عبد العال وتانين.
س: مدرسة خورطقت لسه شغالة؟
ج: شغالة وين، جماعة الجبهة الاسلامية القومية بعد إنقلابهم بتاع يوم 30 يونيو 1989م بثلاثة سنين، طلعوا ليهم قرار قفلوا بيهو المدرسة، آخر دفعة إتخرجت من مدرسة خور طقت كانت سنة 1992م.
س: وفرانسيس دينق دفعته منو في كلية القانون بجامعة الخرطوم؟
ج: أمين مكي مدني، التجاني الكارب، مولانا محمد على المرضي، محمد الفاتح حامد، مولانا زكي عبد الرحمن، مولانا حسن البيلي، عمر شمينا، عمر عبد العاطي وناس تانين.
س: فرانسيس بعد الجامعة إشتغل وين؟
ج: إشتغل في محلات كتيرة جوه وبره السودان وجنوب السودان: إشتغل أستاذ في كلية القانون وأستاذ وباحث فى جامعة لندن، وبجامعة نيويورك، وبجامعة يل وجامعة جونز هوبكنز وفى معهد بروكنغز، وكدبلوماسي اشتغل سفير في عدد من الدول: في الولايات المتحدة الأمريكية، كندا، السويد، النيرويج، الدنمارك، فنلندا ، لحدى ما أصبح وزير دولة للخارجية.
س: وعلاقته شنو بالأمم المتحدة وملف النازحين داخليا؟
ج: سنة 1992م تم تعيين فرانسيس دينق مقرر خاص للأمم المتحدة معني بالمشردين والنازحين داخليا، وإستمر في مهمته دي لحدي سنة 2004م.
س: وإشتغل تاني شنو في الأمم المتحدة؟
ج: إشتغل مستشار خاص للأمين العام للأمم المتحدة في منع الإبادة الجماعية
س: فرانسيس مش كتب ليهو كتب وروايات؟
بكرة بحكي ليكم
سويسرا 24 يوليو 2023م
https://www.facebook.com/nazaras/posts/pfbid02PS6ng82W88AuXedQx7CfYCbJT8uAB6HRZfrwPD59Z8K4CE787hdGZrViAY7vyVyol