ما لكم كيفت حكمون؟ النزوح والهجرة: بين فشل الدولة وعجز المجتمع الدولي (3)

س: أمبارح وقفنا في كتب وروايات بروفيسور فرانسيس دينق
ج: أيوة يا حبوبتي فرانسيس دينق عنده كتب كتيرة منها: صراع الرؤى :نزاع الهويات فى السودان، السودان على حافة الهاوية ، رجل يدعى دينق مجوك ـ سيرة زعيم ومجدد، ذكريات بابو نمر “التقليد والتحديث”، الدينكا في السودان، دينامية الهوية ـ أساس للتكامل الوطني في السودان. ورواية بذرة الخلاص لكن رواية طائر الشؤم The Cry of the Owe عملت ليهو شهرة كبيرة.
س: لييه كانت مشهورة الرواية دي؟
ج: لأنها اتكلمت عن موضوع الهوية السودانية
س: فرانسيس كتبها بالعربي؟
ج: لا، بالإنجليزي، ودكتور عبد الله أحمد النعيم قام ترجمها للغة العربية.
س: نرجع للنازحين والمشردين داخليا، فرانسيس دينق قال شنو في المبادئ التوجيهية الكتبها دي؟
ج: المبادئ التوجيهية دي ياحبوبتي عددهم 30 مبدأ، مقسمين لخمسة فروع، مبادئ عامة، وبعدها بتجي بالترتيب مبادئ متعلقة بالحماية من التشريد، ومبادئ متعلقة بالحماية أثناء التشريد، ومبادئ متعلقة بالمساعدة الإنسانية وأخيرا مبادئ متعلقة بالعودة وإعادة التوطين والإندماج.
س: المبادئ دي كلها متعلقة بس بالنازحين والمشردين داخليا صاح؟
ج: أيوة
س: الناس اليومين دي عاوزين يعرفوا أول حاجة المبادئ البتتكلم عن الحماية أثناء النزوح؟
ج: فعلا لانها مهمة بالنسبة ليهم، عددهم 14 مبدأ من أصل ال 30 بتكلموا عن الحماية أثناء النزوح، يعني تقريبا نص المبادئ التوجيهية الكتبها فرانسيس دينق ركزت على الموضوع ده، وهي:
حق النازحين والمشردين داخليا في الحياة، وممنوع يمارسوا معاهم أي نوع من أنواع العنف ، وممنوع يشنوا عليهم أي اعتداءات، وممنوع تجويعهم، أو استخدامهم كدروع بشرية، وممنوع يشنوا على المخيمات القاعدين جواها أي اعتداءات ، وممنوع التعدي على كرامتهم الشخصية،
س: وتاني؟
ج: ممنوع يبثوا الرعب بين النازحين والمشردين داخلياً، وممنوع القبض عليهم أو حجزهم تعسفيا، ولا يجوز بأي حال من الأحوال أخذهم كرهائن، أو تجنيد أطفالهم أو إجبارهم على المشاركة في الحرب المدورة دي.
س: وحقوق النازحين والمشردين داخليا تاني شنو؟
ج: النازحين والمشردين داخليا ياحبوبتي عندهم تاني حقوق كتيرة منها: حقهم في التنقل من منطقة ومدينة لأخرى داخل البلد، وحقهم في اختيار محل إقامتهم، وحقهم في مغادرة بلدهم؛ وحقهم في طلب اللجوء في بلد تاني، وعندهم حق الحماية من العودة القسرية إلى أي مكان حتكون فيه حياتهم أو سلامتهم أو حريتهم و/أو صحتهم معرضة للخطر، وحقهم في معرفة مصير أقاربهم المفقودين وأماكن وجودهم، وحقهم في لم شمل الأسر، خاصة إذا كان عندهم أطفال، وأكيد حقهم في التمتع بمستوى معيشي مناسب، وضروري يوفروا ليهم الأكل والشراب؛ السكن؛الملابس الملائمة؛ الخدمات الطبية والمرافق الصحية الأساسية وحقهم في التعليم بالمجان خاصة لأطفالهم في المرحلة الإبتدائية.
س: والمبادئ التوجيهية دي ما إتكلمت عن بيوت النازحين والمشردين داخليا ديل وعفشهم وقروشهم الخلوها وراهم؟
ج: إتكلمت يا حبوبتي، وقالت حماية الحاجات دي كلها من النهب دي مسؤولية الحكومة، الحكومة ضرورى توفَّر ليهم الحماية؛ وتمنع كمان قصف وتدمير البيوت وتمنع كمان الاستيلاء غير القانوني على بيوتهم.
س: بس الحاصل الليلة يانزار ياولدي إنو عساكر الدعم السريع والنيقرز والحرامية دخلوا كل البيوت، وين الحماية البتتكلم عنها انت دي؟
ج: مشكلتنا يا حبوبتي إنو الحكومة عاجزة عن بسط هيبة الدولة، ومسؤولية الحماية دي جات كمان من مجلس الأمن، شهر 3 الفات طلع ليهو قرار رقمه 2676 وقال فيهو بالحرف الواحد:
“المسؤولية الرئيسية لحماية السكان المدنيين بتقع على عاتق الحكومة”
س: طيب المبادئ التوجيهية للنازحين والمشردين داخليا دي ما خصصت كلام للنسوان؟
ج: خصصت يا حبوبتي، وقالت ضرورى إيلاء اهتمام خاص للاحتياجات الصحية للنساء، بما في ذلك وصولهن إلى مقدمي خدمات الرعاية الصحية وحصولهن على تلك الخدمات، ومن ضمنها خدمات الرعاية الصحية الإنجابية، فضلاً عن خدمات الإرشاد المناسبة لضحايا الاعتداءات الجنسية وغيرها من الاعتداءات، وكمان حذرت من إغتصاب النساء النازحات والمشردات داخليا، ومن تزويج الفتيات لقاء مقابل مادي، أو الاستغلال الجنسي؛
س: وقالت شنو عن النازحين والمشردين داخليا القاعدين يموتوا بعيد عن بيوتهم وأسرهم؟
ج: المبادئ التوجيهية قالت:
على السلطات المعنية في الدولة ” إن كانت موجودة” استلام رفات المتوفى من النازحين والمشردين داخلياً والتعرف عليه ومنع انتهاك حرمته أو التمثيل به وتسهل عودة الرفات إلى أقرب الأقرباء أو تتكفل السلطات بالدفن اللائق، واحترام مقابر النازحين والمشردين داخلياً. ويكون للنازحين داخلياً حق الوصول إلى مقابر أقاربهم.
س: والمبادئ دي ما إتكلمت على المساعدات الإنسانية؟
ج: إتكلمت
س: قالت شنو؟
ج: قالت تقديم المساعدات الإنسانية للنازحين والمشردين داخليا بقع في المقام الأول على ناس الحكومة، والمبادئ التوجيهية كمان قالت المساعدات الإنسانية ضروري تتقدَّم لكل المحتاجين بمساواة وبعدالة وبدون تمييز لولايات على أخرى.
وعشان تجي المساعدات للنازحين والمشردين داخليا من بره البلد ، ناس الحكومة مفروض عليهم يسمحوا بدخول المساعدات دي، مش كده وبس، كمان مفروض عليهم يسهلوا للمنظمات الإنسانية الدولية توصيلها للمناطق القاعدين فيها النازحين، وتوزيعها بسرعة وبدون عوائق.
س: وتاني؟
بكرة نواصل
سويسرا 25 يوليو 2023م
https://www.facebook.com/nazaras/posts/pfbid0GTb6YNJkPojK4hdHwGn9bvFnkAkFwy217qzpFve7uocccc2sam7eMpeBAKQMqNihl