أشتات كلام في وجه المساء وعلى الهواء الطلق
التوقيع : لا يزال صوتك الفرح

♦️الوعي أحيانًا يكون لعنة، فهو يفتح أبوابًا للقلق والتردد والتساؤلات اللا نهائية.
{{ آلان واتس }}

🔴 من أقوالهم:
▪︎ الذي خطط لمجزرة فض اعتصام القيادة هو نفسه الذي دبر انقلاب ٢٥ أكتوبر ، وهو ذاته الذي أشعل حرب ١٥ أبريل ويقف اليوم ضد أي فرصة لتحقيق السلام..
{{إبراهيم الميرغني، القيادي بالحزب الاتحادي الديمقراطي الأصل}}

🟢 من أوراق نوبية:
▪︎ تعرف قبل كم يوم كان في سمنارهنا عن بنزين الطائرات، قالوا حتي سنة{ 2030} لازم أي خطوط طيران تخلط البنزين حقها بي أقل شئ{ 2 إلى10% } من الوقود الصديقة للبيئة.. المحاضر كان أمريكي من أصل إيراني،تصور الراجل دا قال: الوقود دا حينتج من نبات {العنكوليب } والدولة المرشحة لتكون رائدة في هذه الصناعة هي{ السودان} وتحدث عن {مشروع حلفا الزراعي} والله طلع عارف حلفا أكتر مننا نحن السودانيين، وقال إن السودان يمكن من مشروع حلفا فقط يدخل{ 40} مليار دولار في السنة وقال مفروض أي سوداني يعتبر نفسه من أغنى أغنياء العالم، وقال بعد عام {2030 } حيطلب من شركات الطيران أن يكون الخليط بنسبه تتعدى ال 50%..
■ الأخ سيد مراد..لك التحية والتقدير
▪︎أعمل في مجال البترول منذ نصف قرن، وهذا المقال نقلته عن أحد الأصدقاء وإن شاء الله سوف نتوسع في الدراسة عن الطاقة الخضراء وإمكانية تنميتها في السودان عامة وحلفا الجديدة خاصة..
▪︎▪︎ تعريف بسيط عن وقود الطائرات{هي الجاز الأبيض + مواد ضد التجمد} لأن الجو في الفضاء شديدة البرودة.. أما{ البنزين والعرقي} فهم أيضاً متشابهان فقط تختلف في المعالجات الإضافية
{{ الفاتح إبراهيم طه.. أرقين}}

■ من أرشيف دفاتري القديمه(من عام ٢٠١٧م}
😂 أمريكا هي الدولة الوحيدة في العالم اللي تشبهنا 😂
▪︎ كان في راجل من المغرب يمشي بيوت الخمر{الأنداية} ومايرجع ألا قريب الصبح سكران طاشم لمبه..اهاا لمن نميري طبق الشريعة وعلم صاحبنا بالأمر علق قائلا: (والله عبود ده بااالغ) يعني زولنا ماجايب خبر الدنيا وماعارف منو الحاكم زاتو ..
▪︎ أمبارح قريت خبر يقول أن المؤتمر الوطني يطالب بإطلاق سراح كافة المعتقلين السياسيين ، ومن أمبارح أنا اقرأ في الخبر (وأعاين فيه وأضحك ، وأمشي وأجيهو راجع ، متلاعب ليس إلا..)
▪︎ شوفوا ياجماعة أنا هسع واقف وقاعد أكورك بأعلى صوتي عشان أسمع العالم كله إنه ثبت بما لا يدع مجالا للشك أننا أغبى ناس في العالم وماعندنا مخ يوزن مثقال ذرة خير يرى وما بنساوي أي حاجة، والوهم الكبير زعمنا أننا أحسن ناس، ده فيروس ساكت :
▪︎▪︎ هولندا دي القاعدة تجي في المركز التاني في كأس العالم عندهم كام حواشة كده وكام بقرة تاني ماعندهم اليكتحهم ومع ده كله هم من العالم الأول ..
▪︎▪︎ فرنسا دي غير برج إيفل وإنتاج الروائح وعارضات الأزياء ماعندهم حاجة ورغما عن ذلك فهي من العالم الأول..
▪︎▪︎ اليابان دي بس جبل أولياء عدييل ما عندها غير السمك والساردين والتونا ومع ده كلو واحدة من أكبر الدول الصناعية في العالم ..
▪︎▪︎ الدولة الوحيدة البتشبهنا هي أمريكا ، ناس ملقطين بيض وسود، وتباين في الثقافات الأجناس، أراضي زراعية، معادن، أنهار ، غابات ثروة حيوانية، بترول ..الخ .. بس ديل شغلوا مخهم وبقوا من الدول العظمى ونحنا الله أدانا أي حاجه إلا المخ وبقينا من الدول السجمانه..
{{ أحمد محمد أحمد هاشم ، ▪︎سبط▪︎ الفنان خليل فرح من إبنته عائشة خليل }}

♦️ رجفة قلم ♦️
▪︎▪︎ من قصيدة لن أبكي للشاعرة الفلسطينية فدوى طوقان:
{في فوضى حطام الدّور بين الرّدمِ والشّوكِ وقفتُ وقلتُ للعينين : قفا نبكِ على أطلال من رحلوا وفاتوها تنادي من بناها الدّار وتنعى من بناها الدّار..
▪︎ توفيت الشاعرة عام ٢٠٠٣م وكانت قد أوصت أن يكتب على شاهد قبرها :
{كفاني أموت عليها، وأدفن فيها، وتحت ثراها أذوب وأفنى ، وأبعث عشباً على أرضها، وأبعث زهرة إليها تعبث بها كف طفل نمته..

★{يا مسكين وو أركوني} فاض الشوق والحنين وطفح للحبيبة وللبلد ..صورة من جروف قريتي( ادو) بجزيرة صاي في ريفي السكوت..