كورتين وفكي واحد

كان عندنا مباراة مهمة اليوم داك …ما مريخ هلال… لا “النيل” التكلة ابشر و” الزهرة” الترابي ودي عندنا أهم من لقاء اليونايتد والليفر أما إذا حدثتكم عن مبارياتنا مع “الوحدة” التكلة رفاعةفدي زي لقاءات قطبي مانشستر عديل ..
التكلة ابشر والتكلة رفاعة مانشستر يونايتد ومانشستر سيتي الفرق شنو 😄؟
لاحظ الوحدة التكلة واليونايتد مانشستر …
نرجع لموضوعنا
أنا وثلاثة من الأصدقاء كنا في الإدارة( بعلّموا) فينا وفوق كان في ناس كبار من اساتذتنا اللي تعلمنا منهم في المدارس وفي الحلة والمجتمع…
مباراة الترابي دي تحديدا كانت مهمة ، العادة بنجمع الفريق في ديوان من الصباح ونمشي الإستاد وأهم لحظة لما اللوري يجي قدام الترابي وهاك ياكواريك…
طبعا الناس ديل أهلنا ونسابتنا زيهم زي ناس التكلة وفضل والقلقالة والبشاقرة وغيرها بس في الكورة مافيش يمه ارحميني…
ونحن في المعسكر جاء واحد من اللعيبة نادانا على جنب نحن الإداريين الصغار طبعا مابقدر يمشي على الأساتذة..
العيون منططات والنفس قايم ( مشيت للفكي وقال لي بتغلبوهم بس بعد الجنا الاصيفر ينطرد)
نحن في الحقيقة ما كنا خايفين شديد من المباراة لأنه ناس الترابي ديل عندنا ناس علم وقراية ماناس كورة يمكن اي بيت عندهم لو مافيه اتنين حملة دكتوراة فيهم واحد لكن كورة بنقدرهم.
الفكي بعد حدد الجنا الاصيفر وده طبعا وصف مؤكد حيصيب ولازم يكون في واحد اصيفر قال لازم واحد يمسك ورقة ويدخلها من خلال السلك وكلما الهجمة تمشي علينا يحركها عشان الكورة ماتمشي مع المهاجمين…
طبعا نحن كشباب مستنير 😃😃 رفضنا الفكرة ..
واحد من الأصحاب أخدها منه وقال عشان مانزعزع ثقتهم كلاعبين …
المهم أثناء المباراة عندهم واحد اصيفر كما يقول الكتاب والفكي، كان أحسن واحد ، وفجأة الأصيفر أخد كرت أصفر زولنا بتاع الفكي رفع لينا يده بمعنى شايفين كلامي؟
جماعتنا بقوا منتظرين كرت الاصيفر التاني وصاحبنا لاعب بحذر تقول متفق مع الفكي
وطبعا لا أخد كرت ولافزنا…

الفكي ده ذاته من حلة شمال الكاملين بنتلاقى في الاستاد هم في المساطب الجنوبية ونحن في الشمالية ..كورة سمحة عاصرنهم عصر شديد بس ماجبنا قون الشوط انتهى صفر صفر
بين الشوطين اشتغلت المناكفة قلنا ليهم الليلة حاج فلان اشتغل صاح واحد منهم طلع في السلك وكورك لينا
( ناس التكلة هوي والله ده لعبنا برانا الشيخ سافر ليه تلاتة يوم، علي الطلاق الشيخ كان في كان قضيناكم قبيل من عصراً بدري..