( من غير ميعاد ) …!
( المعلم ) 🌹
قلمي نفسه توقف قليلاً لما عرف إني داير أكتب عن ( وردي )
وهمس في أذني أن رفقاً ( بالأساطير ) …!!
فقلت له رفقا بي أنا الذي سأبحر في بحر ( ما عندو قيف ) وسأحاول التحليق وما أنا بطير …!!
ولو تعب منك جناح في السرعة زيد 🕊️
فمحمد وردي واحدة من أجمل النغمات التي تغني بها هذا البلد ….
هذا المارد الذي جاء من أرض ( النوبة ) حيث السحر
والتاريخ والجمال ….!!
شايل ( طبشيرة ) و ( تأشيرة )
الأولى بدرِس بيها والثانية منحها له كل الشعب السوداني لدخول شرايينه وقلبه والروح …!!
وفي الاتنين ( معلم ) 🙌
( والشعب حبيبي وشرياني أداني بطاقة شخصية ) 🙏
( وردي ) وكأنه سحابة ساقاها الله لنا لتمطر لحناً ونغماً وإبداع…وتلون حياتنا بأغنيات ساحرات وكلمات عظيمة تخاطب الوجدان وتداعب الروح بصوت عظيم وملهم يحمل كل تاريخنا ويتردد صداه في كل الدنيا ….!!
نزل علينا كالمطر مبللاً الدواخل ومنعشاً الصدور
🥰
( وعيونك زي سحابه صيف تجافي بلاد وتسقي بلاد ) 🌦️
( أبو الورود ) نغمة حلوة نرددها كلما ضاقت بنا الدنيا 🎼
وعصفت بنا الأيام…..!!
وتجي راجع تاني تشوف حال البلد والناس ..
🎼
واللقيا أجمل في الحقيقة بلا انتظار
صحّيتي في نفسي الوجود
ورجّعتي لعيوني النهار
( التجاني سعيد ذاتو ببالغ )
😍
كل الطيوب الحلوة يا مولاتي والجيد الرقيق
واللفتة والخصل اللي نامت فوق تسابيح الغريق
( أي عالم هذا الذي كنتم تعيشونه يارجل ) …!!
( وردي ) تاريخ حافل ومفعم بالشعور والإحساس
موهبة صريحة وصوت خيالي واختيارات عبقرية
التقى مع أمير الشرق ( كجراي ) في ( مافي داعي )
و ( كجراي ) كم كان رقيق
وكانت أغنية دافئة بطعم الشرق ونكهة الشمال
( بجة لاقو نوبة ) …💞
والحب ( رطن ) يا عينيا …!!🥰
محمد عثمان كجراي ومحمد عثمان وردي
تشاركا السحر …والجمال ……!
و( محمد عثمان )
و مافي داعي تقولي مافي
يالربيع في عطرو دافي
لهفة الشوق في سلامك
في كلامك وسر غرامك
ماهو خافي …!!
(( هنااالك لمسة ( نبض )) …!!💓
سيدي الحكم
( دي ال ) VAR ما بجيبا ) ….!!
بتتحسا ما بتتشاف 💕
( وردي ) دا غنى لينا في أي حاجه ….وكل حاجة …
وأحلى حاجة …..
عندما يغني للوطن ( نسمو )
غني للمشاعر ( هي ذاتا خجلت ) ..😌
غنى للحبيبة ( حبيناها زيادة ) ❤️🔥
ونامت ( عذارى الحي ) على أنغامه في خدرها
وخلاص كبرتي وليك ( طظعطاشر ) سنه عمر الزهوووور عمر الغراااام …🎼عمر المنا 🎼
إن شاءالله يوم تجمعنا جنة حبنا💞)
ومن ( تزوجن ) منهن قامت سوت ( ليهو ) قهوة كدا من غير سبب بعد أن ملأها وردي حباً ومزاج
ومن ( انفصلن ) قسمة ونصيب ( طبطب ) وردي على الخاطر الما عاد ..وهن في ( حلال ) الله و ( حرام ) ألسنة البعض
فيلاطفهن الرقيق …
لو ﺑﺈﻳﺪﻱ ﻛﻨﺖ ذللت ﺍﻟﻤﺤﺎﻝ
ﻭﺍﻷﻣﺎﻧﻲ ﺍﻟﺪﺍﻳﺮﺓ ﻓﻲ ﺩﻧﻴﺎﻱ ﻣﺎﻛﺎﻧﺖ
ﻣﺤﺎﻝ
ﺩﻱ ﺍﻹﺭﺍﺩﺓ ﻭﻧﺤﻦ ﻣﺎ ﺑﻨﻘﺪﺭ ﻧﺠﺎﺑﻪ
ﺍﻟﻤﺴﺘﺤﻴﻞ
( فقد التقيا دون موعد وافترقا ( من غير ميعاد )
وضاع الكلام ماتت حروف اللقيا قبال أهمسا
والله ما غابت محاسنك لحظة لا الجرح اتنسى
للّيلة ما وشوش نسيم في روضو وما غرد مسا
للّيلة ما سافر عبير في الطيب يغازل نرجسة
والنرجس مواسم ……!!
ومواسم من الفرح قادمات…. وبكرة أنضر 🙏
وعمرك كلو فرح يازينة …شيلي من الأفراح وادينا
لما يغني للبلد دي بشوفا بتاوق بين الغمام وتسترق السمع عشان تسمع وردي
وتتوحد المشارق والمغارب في التفاف نادر وتوحد
ساطع ،،،تنصت بذات الاحساس …..!!🥰
مش بقول ليك الزول دا وطن …!!
( أها وردي دا وطن )
تلوح فاشر السلطان وتتسلطن على أغانيه ..والكردافة يعشقون وردي …!!
الجزيرة تعرض بي فد كراع …والشمال مقفول للفرعون
النص كلو حقو ووسط الدايرة يا أجمل نايرة خلى قلوبنا تطير …!!
وأهل الشرق يغمدوا سيوفهم في حضرته وسوات العاصفة بي ساق الشتيله الني
انفصل ( الجنوب ) فتقاسمنا النفط والأرض والشجر
وكان ( وردي ) عصياً على التقسيم فتمدد بيننا كما النيل
وبقي في قلب الجنوب ….!! ……
وفينا 💕
ويأتيها من يشاء ….!
ووطنا البي إسمك كتبنا ورطنا
أحبك 💗 ..
أحبك ملاذ
وناسك عزاز
أحبك حقيقه..وأحبك مجاز …😍
ونحن ذاتنا يا وردي حبيناك من قلوبنا واخترناك يا حلو
تغني ( للعلما ) من شعراء بلادي وكان ( تماسه ) مع ( التربال ) ( إسماعيل حسن ) شحنة ( ضي ) …
فهو لقاء الكبار وإخوة التراب …!!🌴
إسماعيل يكتب بسعفات النخل ومداد الروح
ووردي يغني بعظمة البركل وروح تهراقا ….!!
ورِقة بنات الحلة ….!!🥰
وقد هبت نفحات الشمال على السودان لوحة
من خلال هذا الثنائي الملهم …!!
إسماعيل بلعب الباص بالمقاس …ووردي بشوت
قي المقص ….
( والله اصفق واعلق ) …..👏👏
ينتظره العاشقون على شبابيك الهوى وبوابات الغرام
وشرفات البيوت …🙏
ولو بهمسة ….!!
قول احبك 💕
والله إذا لم يقلها بعد كل هذا التداعي فهو غير جدير بهذا الحب 💕 وغلطة كانت غرامي ليك …!!
ولو بنظره حتى عابره …….قول أحبك
لو بتحلم فى منامك ……..قول أحبك
لو ترسل لى سلامك ……..قول أحبك
يا حبيبى كل كلمه من شفايفك أحلى غنوه
وكل نظرة من عيونك فيها سلوى ….!!
( إسماعيل يكتب ووردي يسكب
والنتيجة حديقة وموسيقي ….وحبينا اللطافة والناس القيافة ) 🥰
وكانت اللقاءات الموصوفة والعبقرية في المستحيل وأسفاي …وبعد أيه…..
وغيرها من الأغنيات المفروض ( تتبروز ) وتتعلق في ( النيل )
ويتجدد لقاء الغيوم بين ( وردي ) والعبقري الآخر
( عمر الطيب الدوش ) والذي إذا لم يكتب سوى ( بناديها) لدخل التاريخ …
( الدوش ) درويش الشعر السوداني و ( وهبوبو) الباردة
ياخد ليهو طلعه جوية كدا ويجي نازل يقول جنس كلامو دا
ولما تغيب عن الميعاد
أفتش ليها فى التاريخ واسأل عنها الأجداد
واسأل عنها المستقبل اللسع سنينو بعاد
وافتش ليها فى اللوحات محل الخاطر الما عاد
وفى الأعياد …
وفى أحزان عيون الناس
وفى الضل الوقف ما زاد
بناديها .. !!
ينادوك الملايكة إنت ….!!
هسا دا زول نصيح
بتجيب الكلام دا من وين يازول …؟؟؟
( الدوش ) عاش ومضي زي الما قال حاجه ….!!
وهو الكتب
بتطلعي إنتي من غابات ومن وديان ……….!!
ومني أنا 😳
( لقد قلت كل شيئ يارجل ) 🙏🙌
غنى للحلنقي فسال الحب جداول
ماعرفت أكتب عن الحب ولا وردي ولا الحلنقي
تشابه عليا ( القمر )
ويا أعز الناس حبابيبك نحن زيدنا حنان
دا العمر زادت غلاوتو معاك
وصالحني الزمان
يا أحن الناس
ويا أعز الناس حنان
🫶
غني ( وردي ) لأكتوبر حتى ظننت أن هذا الشهر أصبح ينتظر ( وردي ) ليحتفي هو ب ( وردي ) كل عام …!!
في ملاحم خالدة التقي فيها ( الفرعون ) بصلاح أحمد إبراهيم ومحمد المكي إبراهيم والفيتوري
( شوف المنتخب دا ) 🥰
مثلث ( برمودا )
ديل لو لعبنا بيهم في ( كاس العالم ) لحجزنا مقعدنا في النهائي مبكراً ..
ناس زي المطرة ….أسماء ذاتا ( تطمن ) ….
أولاد ( إبراهيم ) والفيتوري وقد نزلوا علينا ( برداً وسلاماً ) …….وغنوة …✌️
وردي دا أسطورة في غناهو وكلامو ….!!
وحتى مرضو 😥
زرعو ليهو ( الكِلية ) فقابل ذلك بشموخ الأجداد وإيمان المحتسبين وصبر الرجال ومضي مبحراً في إبداعه لايبالي
( الملهم دا أصلو بكون ملهم في أي حاجة )
( وﻳﺎ ﺍﻟﻤﺴﻴﺮ ﻭﻣﺎﻙ ﻣﺨﻴﺮ إنت ﻳﺎ الصابر وﻋﻨﺪ ﺍﻟﻠﻪ ﺟﺰﺍﻙ )
( الكِلية ) الزرعوها ذاتا تكون استمتعت فجأة لقت نفسها جوه العملاق دا )
وهي لم تكن أول عملية زراعة يجريها ( الفرعون )
فقد زرعو فيه الموهبة الأسطورية من قبل
وأجريت لها زراعة المشاعر وقد سقاها من دمه ورعاها بكيانه فاهتزت وربت واخرجت من كل زوج بهيج …!!💕🌿🌺
لم يتوارى خلف الردود الدبلوماسية وولم يختبئ خلف اللاحقيقة لذلك كان مباشراً في آرائه صريحاً في التعاطي مع أزماتنا الفنية والوطنية بذات صراحته في سبر أغوار الوجدان السوداني …!!
وأنا لا الصبر قادر عليّ..
ولا عندى حيله …..!!
واسمحيلا تشوف عيونك اسمحيلا
نحن الشعب السوداني الموقعون أدناه وبكامل ارادتنا
نقول لك …..!!
لقد سمحنا …..!!🙏
ومن لغيرك نسمح يا هرمنا …
ويا أصلنا و مبتدانا يا حلاة مسرح صبانا …..وذكرياتنا
ومشتهانا
إنت فينا كبير و ريدنا ليك كبير ….!!
نستلفها من رفيق القمة ( كابلي ) الذي غناها للوطن …وأنت وطن …!!
ولو كان حياً لقال نعم ……!!
وأضاف لها يا ( قمر دورين )
وكلاكما أقمار ….!!
انا لا أوثق لك فماعونكُ يتسع لكني فقط أذكر بفنك وعظمتك وجمالك …!!
ستظل فينا أغنية خالدة ورمزاً كبير وعطراً نتجمل به كل ما ضاق بنا الحال …!!
واشتهينا لينا مرقة ….!!
والمقدر ما بنجيب ليهو بديل …!!
وستبقى فينا مطراً وعطراً ورزاز ….!!!
وحدثتك حديث الروح …
صحي يا ( أبو الورود ) ….!!؟؟؟؟
قول أحبك 💕
