أشتات كلام في وجه المساء وعلى الهواء الطلق التوقيع: لايزال صوتك الفرح

🟢 أكون تربال ولا أكون وزير إنقاذي:
●قالت لي: بصراحه ( عليك كرزما تستاهل تبقى وزير)، يا زول الكلام المعسول من الزوله السمحه حفز النفس الأمارة بالجشع وخلي الوسواس الخناس يغريني بالعز والبحبحة والشفشفة بدون مجمجة من مال الحكومة اللي بيقول عليه سايب وهملة، ويا زول تبقى وزير، فيللا في سوبا ،وضيعة في كافوري وأطيان وعقارات وشركات في سنتر الخرطوم والسهر بالكوم ، وتسوح مع أسرتك في بلاد الله لا تخلي دبي ولا كوالا لامبور، ولا لندن ولا جنيف ولا باريس والخ ..الخ ..وكمان تعرس مثنى وثلاث ورباع وفك إرتباط للبعلولات( بس بالدس من البعلولة الأصلية)، أعرس ما سمحت لي العافية طالما جيب الوزير ملان ، وسيارات فاخرة(كرت) والبنزين والكهرباء مجانا، والاتصالات مجانا على جميع الشبكات لسعادة الوزير اللي هو انا ولاسرتي الكريمه. يا زول غرقت في بحر احلامي وانا متخيل نفسي بقيت وزير وبرقص مع بشه واللمبي وجوقه من الجماعة مع اهازيج (ياهو دى) ، استيقظت من غفوة احلامي الظلوطية على(كوراك) المدام من جو المطبخ تناديني بانو الفطور جاهز{بالتركيج}،لكين الوسواس الخناس برضو باراني :
-انت مش تستاهل تبقى وزير، ده انت مفروض تبقى النائب الاول للرئيس ، يا زوول بطل الكسل قوم الحق (دفعتك) الوزير (طه الفنجري) واستفيد من خبرته الطويله في فنون (الهبش واللطش ، وما تعمل لي فيها مولانا)، لكين مشكلتي طه الفنجري لي زمن ما لاقيتو ، من ايام المدرسة الاوليه.هو فعلا كان صاحبي شديد وولد غلبان ود تربال زيي ، واتذكر انا كنت شاطر وما بفوت الخمسه الاوائل وهو كان دايما بجي الطيش. يا زول الوسواس الخناس حاصرني وعصرني عصير شديد، يزن ويزن في راسي لمن اقنعني اروح اقابل سعادة الوزير طه الفنجري..
● يوم من صباح الله مشيت سلفت (جلابيتو البيضا مكويه وعمامته التوتل السويسري الاصلي الناصع البياض الترباسي الطول (سبعه متر تقريبا)من جاري ابو طمايه وسلفت كمان من قريبي ابومريم ( نعالو الفاشري اصلي من جلد النمر) ولفحت شال عظمه ، المهم اتهندمت تمتم واتعطرت ورحت اقابل الوزير الدفعه طه الفنجري. فرحت لمن لقيت (عربيه) فاخره واقفه جنب سور قصر الوزير الفخم، وقلت دي اكيد عربية سعادتو . دقيت على باب القصر، فتحت لي شابه صغيره حليونه وقفت تعاين لي مده { فوق تحت} لامن خجلتني وقالت لي:
-سوري عمو(بابا) ما موجود ، اكيد مشى المزرعة في كافوري .
••سألتها بفضول تربالي:
-طيب يا بتي العربيه ديك جنب السور حقت منو؟ والكافوري دي بوين؟
ضحكت وقالت :
-دي يا عموو مش اسمها {عربيه} دي اسمها { سيارة }وهي بتاعت{مامي} وكافوري هي الحته اللي بينوم فيها الرئيس..
رددت بسري{ بشه زاتو بشحمه ولحمه.!!}
●يا زول بقي مشوار يومي رايح وجاي بين البيت وقصر الوزير طه الفنجري( الوزير يمكن في الوزارة ، الوزير يمكن في كوبر، الوزير مسافر ، الوزير مشغول ، الوزير عنده اجتماع) وارجع خايب.. اهاا قلت الا اعتصم قدام القصر لمقابلة الوزير، ونفذت الاعتصام بنجاح، وهتفت ( صابيها .صابيها)
★ نتابع ★
{{ سيد حسن مراد }}

💚 بوووح:
يا صوتها لما سرى عبر الأثير معطراً ، مثل الحرير نعومةً ، ونداوةً ، وتكسراً..مثل الصباح طلاقةً، ورشاقةًوتخضراً .. وهما حنيناً حالماً ،وصبابةً وتأسراً.
{{محمد يوسف موسي }}

😂من ارشيف دفاتري القديمه:
● قالوا كبري المنشيه قرضه (الجقر) ومن عندياتي جريا عليه قلت :ان كبري المسلميه عشان صغير ممكن نقول قرضته (سحليه)، اما طريق (الخرطوم بارا الابيض) الذي افتتح اربع مرات متعاقبه علي يد (بشه) فقد قرضته (بشكة) من القطط السمان مش كده يا وداد..؟!!
● غايتو في زمن الكيزان العجيب شفنا اشياء خارقه للطبيعة، شفنا ( بعيوننا اللي هتاكلوها الدود)صوره لكبري (الستيت) مبحر عديييل وهو يشق امواج الاتبراوي وكمان سمعنا اشاعات كانت ملت البلد انو (اليخت الرئاسي) قد توجه من مرساه في الخرطوم (برا) الي بريتوريا في جنوب افريقيا. وعلق حينها بلديتنا البعشوم اب زرد ود زنوبه بسخريته اللاذعه بعد ان ضرب كفا بكف (ما دللي دربديل نيشن فييشين.. اخر الزمن شفنا ا القرون في رؤوس الديوك) .
{{سيد حسن مراد}}

💚 رجفة قلم💚
فرأيتُ في عينيكِ أحلامَ العُمر ،وشدوتُ لحناً في الوفاءِ لعله ما زال يؤنسني بأيامِ السهر.وغرستُ حُبكِ في الفؤادِ وكلما مضت السنينُ أراهُ دوماً يزدهر. وأمامَ بيتكِ قد وضعتُ حقائبي يوماً وودعتُ المتاعبَ والسفر. وغفرتُ للأيامِ كُلَّ خطيئةٍ وغفرتُ للدنيا وسامحتُ البشر..
((فاروق جويده))

● النيل ، والخضرة ،وراحة البال.تبقى ايه الدنيا ،لو ما قعدات ونسه اريحية في راكوبه زي دي وقت القيلوله.